जय जोहार…. राजधानी रायपुर के बिरगांव अऊ चंगोराभाठा इलाका ल कन्टेनमेंट जोन घोसित कर दे गे हे। क्योंकि राजधानी के दुनो इलाका म कोरोना संक्रमित मरीज के पुष्टि होय हे। ऊहचे बिरगांव इलाका के फैक्टरी म काम करइया युवक के कोरोना ले मौत हो गिस। जेखर मौत के बाद रिपोर्ट ह पाजिटिव आय रहिस। छत्तीसगढ़ म कोरोना ले ए पहली मौत रहिस। प्रशासन ह एहतियात डेढ़ किलोमीटर तक के इलाका ल सील कर दे हे। लोगन मन ल जरूरत के सामान उपलब्ध कराय बर नोडल अधिकारी नियुक्त करे गे हे।
गौरतलब हे कि छत्तीसगढ़ म कोरोना संक्रमण के मामले ह सरलघा बाढ़त जात हे। सनिच्चर के अऊ 32 नवा पाजिटिव मिले रहिस। स्वास्थ्य विभाग के तरफ ले जारी मेडिकल बुलेटिन म 32 नवा मरीज के पुष्टि होय रहिस। जेमा कोरिया ले 20, बलरामपुर ले 6, कांकेर ले चार, रायपुर ले दू नवा मरीज मिले रहिस। जेखर बाद अब प्रदेश म सक्रिय केस के संख्या ह बाढ़ के 344 हो गे हे।
