जय जोहार…. प्रधानमंत्री नरेन्द्र मोदी के दूसर कार्यकाल के एक साल के उपलब्धि ल ले के भाजपा के जारी वर्चुअल रैली ल अब बड़का मंच मिलही। देशव्यापी ए अभियान के खाती छत्तीसगढ़ भाजपा ह 28 जून के एक बड़का वर्चुअल रैली ल करे ल जावत हे। जेला मध्यप्रदेश के मुख्यमंत्री शिवराज सिंह चौहान ह सम्बोधित करही।
ए रैली के जरिये तीन लाख ले जियादा कार्यकर्ता समेत करीब दस लाख लोगन मन ल जोड़े के लक्ष्य ल संगठन ह रखे हे।
वर्चुअल रैली ल ले के भाजपा ह आज प्रेस कांफ्रेंस ले के जानकारी ल मीडिया ले साझा करे हे। ए प्रेस कांफ्रेंस ह प्रदेश अध्यक्ष विष्णुदेव साय, पूर्व मुख्यमंत्री डॉ. रमन सिंह, राज्यसभा सांसद रामविचार नेताम, राष्ट्रीय महासचिव सरोज पांडेय, बृजमोहन अग्रवाल, राजेश मूणत के मौजूदगी म होय हे।
भाजपा प्रदेश अध्यक्ष विष्णुदेव साय ह कहिन कि प्रधानमंत्री नरेंद्र मोदी के दूसर कार्यकाल के एक साल पूरा हो गे हे। भाजपा वर्चुअल रैली के जरिये एला लोगन मन तक पहुंचाय के काम करत हे। 28 जून के एक बड़का वर्चुअल रैली के आयोजन करे ल जावत हे। जेला मध्यप्रदेश के मुख्यमंत्री शिवराज सिंह चौहान ह संबोधित करही।
