प्रदेश म जुलाई बर केरोसिन के आबंटन ह हो गे जारी

जय जोहार…. छत्तीसगढ़ के उचित मूल्य के दुकान अउ हॉकर मन के तरफ ले जुलाई महीना म उपभोक्ता मन ल वितरण करे बर 4476 किलो लीटर केरोसिन के आबंटन जारी करे गे हे। ए आबंटन ल खाद्य नागरिक आपूर्ति अउ उपभोक्ता संरक्षण विभाग के तरफ ले जारी करे गे हे।

जुलाई महीना म सार्वजनिक वितरण प्रणाली के तहत प्रचलित सब्बो प्राथमिकता, अंत्योदय अउ अन्नपूर्णा राशन कार्डधारी मन ल केरोसिन के पात्रता होही।
खाद्य विभाग के अधिकारी मन ह बताइस कि नगरीय क्षेत्र के राशन कार्डधरी मन ल अधिकतम दू लीटर मिट्टी तेल, ग्रामीण क्षेत्र के अंतर्गत अनुसूचित क्षेत्र म अधिकतम तीन लीटर अउ गैर अनुसूचित क्षेत्र के राशन कार्डधारी मन ल अधिकतम 2 लीटर केरोसिन के पात्रता ह होही।
केरोसिन वितरण करइया हॉकर ह जिला प्रशासन के तरफ ले तय उचित मूल्य के दुकान के सामने खड़े हो के राशन कार्डधारी मन ल केरोसिन के वितरण करही। हॉकर मन बर प्रति हॉकर 85 लीटर के मान ले अलग आबंटन जारी करे गे हे।