सीएम ह कोरोना काल म बस संचालक मन ल दे हे बड़का राहत, जून महीना के मासिक कर म घलो मिलिस छूट
जय जोहार…. मुख्यमंत्री भूपेश बघेल ह यात्री बस संचालक मन ल बड़का राहत दे हे। सीएम ह यात्री बस संचालक मन ल जून महीना के मासिक कर म घलो छूट प्रदान करे हे। एखर पहिली राज्य सरकार के तरफ ले अप्रैल अउ मई महीना के मासिक कर म छूट प्रदान करे गे रिहिस।
अइसने छत्तीसगढ़ सरकार के तरफ ले बस आपरेटर मन ल अप्रैल, मई अउ जून तीन महीना के मासिक कर म भुगतान के छूट ह मिलही। छत्तीसगढ़ सरकार के ए निर्णय ले प्रदेश के यात्री बस संचालक मन ल लगभग पांच करोड़ रूपिया के लाभ प्राप्त होही।
गौरतलब हे कि कोरोना वायरस के दौरान लाकडाउन ले उत्पन्न परिस्थिति म प्रदेश के बस आपरेटर मन ल अलग-अलग कठिनाई के सामने करे ल पड़िस। जेखर ले राहत पहुंचाय बर मुख्यमंत्री ह परिवहन विभाग ल निर्देश दे रिहिस। लॉकडाउन अवधि म यात्री बस के ओखर निर्धारित मार्ग म संचालन ह बन्द रिहिस।
मुख्यमंत्री के निर्देश म परिवहन विभाग ह अंतरराज्यीय, अखिल भारतीय पर्यटक परमिट अउ सब्बो मंजिली यात्री वाहन मन ल अप्रैल अउ मई माह के अवधि बर मासिक कर के भुगतान म छूट दे गे रिहिस। राज्य के अलग-अलग मार्ग म नियमित चलइया यात्री बस के संचालन ह जून महीना म घलो पुरा बंद रहे हे।
जेखर ले प्रभावित बस संचालक मन के तरफ ले टैक्स म छूट के मांग पर सीएम ह जून माह म घलो देय मासिक कर म छूट प्रदान कर दे हे।
