Chhattisgarh म हरेली तिहार ले गोधन न्याय योजना के होही शुभारंभ

जय जोहार…. छत्तीसगढ़ (chhattisgarh) के पारंपरिक हरेली तिहार ले प्रदेश सरकार के महत्वकांक्षी गोधन न्याय योजना के प्रदेशव्यापी शुभांरभ होही।

ए दिन सोमवार के राज्य के सबो जिला के गौठान म कार्यक्रम होही। जिहां मुख्यमंत्री भूपेश बघेल, मंत्री, संसदीय सचिव, विधायक अउ स्थानीय जनप्रतिनिधि मन ह कार्यक्रम म शामिल हो के ए योजना ल शुभारंभ करही।

छत्तीसगढ़ (chhattisgarh) के सीएम भूपेश बघेल ह सोमवार के बिहिनिया 10 बजे मुख्यमंत्री निवास म हरेली पूजा के संग गोधन न्याय योजना के शुभारंभ करही। सीएम बघेल ह एखर बाद बिहिनिया 11 बजे रायपुर जिला के आरंग विकासखंड के आदर्श ग्राम बैहार अउ एखर बाद दुर्ग जिला के पाटन म आयोजित कार्यक्रम म भाग लेही अउ गोधन न्याय योजना के शुभारंभ करही।

प्रदेश के सबो जिला म गोधन न्याय योजना के शुभारंभ कार्यक्रम के आयोजन करे जाही। जिहां मंत्री, संसदीय सचिव, विधायक अउ आन जनप्रतिनिधि मन ह भाग लेही।

गोधन न्याय योजना ह ग्रामीण, किसान अउ पशुपालक मन ल लाभ पहुंचाय के एक अभिनव योजना हे। छत्तीसगढ़ (chhattisgarh) सरकार के तरफ ले एखर शुरुआत हरेली तिहार ले राज्य म करे जावत हे।

ए योजना के तहत किसान अउ पशुपालक मन ले दू रूपिया किलो के दर ले गोबर के खरीदी करे जाही। जेखर जरिये गौठान म बड़का पैमाना म वर्मी कम्पोस्ट खाद के निर्माण अउ आन उत्पाद ल तैयार करे जाही।