रमन ह टिप्स देवत कहिन के आखिरी बॉल म छक्का मारइया ह जीतथे चुनाव

जगदलपुर । भाजयुमो प्रदेश कारयसमिति के बइठक म सामिल होय बर आय मुख्यमंत्री ह युवामन ल प्रोत्साहित करे बर कई ठन उदाहरन आघू रखिस। सचिन तेंदुलकर ले लेके स्वामी विवेकानंद पर बोलत हुए मुख्यमंत्री ह कहिन के भारतीय जनता युवा मोरचा के कारयकरता मन कुछु घलो करे के दम रखत हे अउ टी-20 मइच के तरह होवइया चुनाइ म आखिरी बॉल म छक्का मारइया ही चुनाइ जीतथे।
भारतीय जनता युवा मोरचा के प्रदेस कारयकारिनी के बइठक म मुख्यमंत्री डॉ रमन सिंह ह युवामन ले चुनाइ के तइयारी बर जुट जाय बर कहिन। उमन प्रदेस के उन 2,50,0000 नवा वोटरस ल पार्टी ले जोड़के, भाजयुमो कारयकरता मन ल सोसल मीडिया अउ राज्य सरकार के उपलब्धी मन ल मतदातामन के बीच जाय के अपील करिस। मुख्यमंत्री ह कहिन के भाजयुमो कारयकरता सचिन तेंदुलकर के जइसे कम उमर म घलो अपन आप ल साबित करे के काबिलियत रखथे। उमन ह टी-20 मइच के हवाला देवत हुए कहिन के चुनाई इहीं फॉरमेट के हे, जिहां आखरी बॉल म छक्का लगाय के जरूरत हे।
डॉ रमन ह कहिन के आघू 4 महीना म चुनाइ होवइया हे, लिहाजा भाजयुमो के हर कारयकरता ल सरकार के रीति-नीति के लेके आम मतदाता मन के बीच पहुंचे के जरूरत हे। उमन कहिन के मिलेनियम वोटर म उमन ल 2,50,0000 मतदाता मन ल टारगेट कर के जनसंपरक करना हे, जे ह पहिली बार वोट डाले बर जाही, ये मतदाता मन पार्टी के पक्ष म वोट करही त नतीजा एकतरफा होही।
सीएम ह जोर देवत कहिन के भारतीय जनता पार्टी ह कांग्रेस के मुकाबला म जादा विकास पूरा छत्तीसगढ़ म करिस हे। सिक्छाकरमी किसान अउ अन्य मुद्दा मन के बात करत हुए उमन कहिन के वरतमान सरकार ह कांग्रेसी मन के तीर कोनो विकल्प नइ रखे हे। धान के समरथन मूल्य बढ़ाय समेत किसान मन के आय दोगुनी करे के केंद्र सरकार के योजनामन के आघू कांग्रेसी प्रचार अभियान सरकार के खेलाफ काम नइ करत हे। बस भारतीय जनता युवा मोरचा के कारयकरता मन ल ये दिसा म काम करे के जरूरत हे।
उमन कहिन के भारतीय जनता पार्टी म हर कारयकरता सर्वोच्च पद तक पहुंच सकत हे। येकर सेती कोनो कारयकरता मन अपन आप म कम नइए। अउ चुनाइ मिसन म जुट जाही। उमन युवामन बर सरकार कोती ले होवत विकास कारय मन के घलो बखान करय।