chhattisgarh सरकार ह शैक्षणिक सत्र बर जारी करिन गाइडलाइन, प्रवासी मजदूर मन के लईका मन ल घलो दे जाही प्रवेश
जय जोहार…. छत्तीसगढ़ (chhattisgarh) सरकार के तरफ ले स्कूल म शैक्षणिक सत्र 2020-21 के प्रवेश प्रक्रिया ल तय कर दे गे हे।
एखर तहत प्रवासी मजदूर मन के लईका मन ल घलो प्रवेश दे जाही।
कक्षा ग्यारहवीं ल छोड़ क आन सबो कक्षा म प्रवेश के प्रक्रिया ल 15 अगस्त तक पूरा करे बर केहे गे हे। कक्षा ग्यारहवीं म प्रवेश बर मुफ्त फार्म ह स्कूल के काउंटर म 31 अगस्त तक मिलही।
विद्यार्थी ह ए फार्म ल प्रवेश बर 31 अगस्त तक जमा कर सकही। (chhattisgarh) राज्य शासन के स्कूल शिक्षा विभाग ह ए संबंध म सबो जिला शिक्षा अधिकारी मन ल निर्देश जारी कर दे हे।
जारी निर्देश म केहे गे हे कि कोरोना महामारी संक्रमण ले बचाव ल देखत हुये वर्तमान म सबो स्कूल ह बन्द हे। एखर सती स्कूल म प्रवेश के प्रक्रिया ह सुरु नई हो पाय हे।
स्कूल शिक्षा विभाग के तरफ ले स्कूल म पढ़ई तुंहर दुआर योजना के तहत आनलाइन अउ आफलाइन मोड म कई योजना ल चलाय जावत हे। जेखर ले लईका मन ल घर बइठे पढ़े अउ सीखे म मदद मिल सके।
ए योजना के लाभ ह तब मिल सकही, जब लईका मन ल मुफ्त पाठ्य पुस्तक घलो घर बइठे मिले। एखर वितरण बर लईका मन ल अवइया कक्षा म प्रवेश कराय जाना आवश्यक हे।
एखर आलावा स्कूल शिक्षा विभाग के आन योजना के लभा तब मिल सकही, जब ए लईका मन के प्रवेश प्रक्रिया ह पूरा होही।
