पखांजूर। कांकेर के माहला इलाका म बिहनिया 4 बजे होय मुठभेड़ म 2 जवान शहीद होगे। दूनों जवान बीएसएफ के बताए जात हे। बीते 5 दिन के भीतर म कांकेर के पखांजूर इलाका म ये दूसर घटना हे।
पखांजूर के प्रतापपुर थाना इलाका के माहला कैंप ले बीएसएफ के जवान सर्चिंग बर निकले रिहन हे। वापिस लउटत बेरा म उमन नक्सल एम्बुश म फंस गे अउ घात लगाके बइठे नक्सली मन ह फायरिंग सुरु कर दीन।
जवाब म जवान मन घलो फायरिंग सुरु कर दीस। दूनों ओर ले फायरिंग के बीच म 2 बीएसएफ के जवान शहीद हो गे, जबकि 3 जवान के घायल होगे। शहीद जवान के नाम सीटी लोकेन्द्र सिंह, राजस्थान अउ सीटी मुख्तयार सिंह, पंजाब हे। बता दन के येखथर पहिली इहीं इलाका म 9 जुलाई के घलो बीएसएफ के 2 जवान शहीद होय रिहिन हे।
मुख्यमंत्री डॉ. रमन सिंह ह नक्सली मन के हमला म बीएसएफ के दू जवान मन के शहादत गहरा दुःख व्यक्त करिन हे। उमन ह ये नक्सल हमला के तीव्र निन्दा करिन हे। डॉ. सिंह ह शहीद जवान मन के शोक संतप्त परिवार मन के प्रति अपन ओर ले अउ छत्तीसगढ़ के जनता के ओर ले गहरा संवेदना प्रकट करिन हे। मुख्यमंत्री ह हमला म घायल जवान के जल्द स्वस्थ होय के कामना करिन।
राज्यपाल बलरामजी दास टंडन ह घलो शहीद जवान मन के प्रति गहरा शोक व्यक्त करिन हे। राज्यपाल ह शहीद जवान मन ल श्रद्धांजलि अर्पित करत हुए उमन के परिजन मन के प्रति गहरी संवेदना व्यक्त करिन हे। उमन नक्सली हमला म घायल होय जवान के शीघ्र स्वास्थ्य लाभ के कामना करिन हे।
