Independence day : सीएम भूपेश बघेल ह रायपुर म करिन ध्वजारोहण, प्रदेशवासी मन ल दे हे कई सौगात, पढ़ो पूरा खबर
जय जोहार…. स्वतंत्रता दिवस के 73वां वर्षगांठ म आज राजधानी के पुलिस परेड ग्राउंड म मुख्य समारोह के आयोजन करे गे हे।
ए अवसर म मुख्यमंत्री भूपेश बघेल ह ध्वजारोहण करिन। सीएम बघेल ह प्रदेशवासी मन ल स्वतंत्रता दिवस के बधाई अउ शुभकामना दे हे।
ए अवसर म सीएम बघेल ल अपन संदेस म कहिन कि हमन ह आजादी के लड़ाई ले न्याय के जेन यात्रा ल सुरु करे रहिस, ओला अब जन-जन तक पहुंचात हन।
किसान मन बर राजीव गांधी किसान न्याय योजना अउ ग्रामीण स्वावलंबन के सबले बड़का गोधन न्याय योजना ल सुरु करे गिस।
इहीं नवा छत्तीसगढ़ गढ़े के हमर मन के सपना अउ इरादा के आधार हे।
ए मउका म सीएम बघेल ह प्रदेशवासी मन ल कई सौगात दे हे। सीएम ह डॉ राधाबाई डायग्नोस्टिक सेन्टर अउ पढ़ई तुंहर पारा योजना घलो सुर करे के घोसना करिन।
सीएम ह कहिन कि नगर निगम म स्थापित 101 मुख्यमंत्री वार्ड कार्यालय ले नागरिक मन ल मिले सुविधा ह उत्साहवर्धक हे।
अब हम घर पहुंच सेवा बर नगरीय क्षेत्र म मुख्यमंत्री मितान योजना ल सुरु करत हन।
विद्युत के पारेषण-वितरण तंत्र की मजबूती बर मुख्यमंत्री विद्युत अधोसंरचना विकास योजना प्रारंभ होही।
प्रदेश म ‘महात्मा गांधी उद्यानिकी एवं वानिकी विश्वविद्यालय, 4 नए उद्यानिकी कालेज अउ एक खाद्य तकनीकी अउ प्रसंस्करण कालेज खुलही। दुग्ध उत्पादन अउ मछली पालन ले बढ़ावा दे ल 3 विशिष्ट पालीटेक्निक कालेज घलो खोले जाही। राम वन गमन पर्यटन परिपथ के निर्माण के पावन कार्य म प्रदेश की जनता के सहभागिता बर ‘राम वन गमन पर्यटन परिपथ विकास कोष के गठन करे जाही। नवगठित जिला गौरेला-पेण्ड्रा-मरवाही म महंत बिसाहू दास जी के नाम ले उद्यानिकी महाविद्यालय खुलही। प्रशासन म महिला मन के भागीदारी ल बढ़ाय राज्य म होवइया नवा नियुक्ति अउ पदोन्नति बर गठित करे जवइया समिति म महिला प्रतिनिधि के उपस्थिति ल अनिवार्य करे गे हे।
