डॉक्टर ह करिस अइसे काम.. जेखर सेती सबो झन करत हे सराहना

बलरामपुर। बलरामपुर जिला के एक चिकित्सक ह एंबुलेंस चलाके गर्भवती महिला ल अस्पताल म भर्ती करावा के ओखर प्रसव कराइस। प्रसव के बाद जच्चा अउ बच्चा दूनों स्वस्थ हे। दरअसल 102 अउ 108 एंबुलेंस करमी मन के हड़ताल म चले जाय ले स्वास्थ्य बेवस्था चरमारा गेहे । एंबुलेंस चालक मन ह एंबुलेंस अउ सरकारी मोबाइल ल दफ्तर म जमा करा देय हे। जे मा रोजाना कतको कॉल्स आवत रहिथे।
सामरी स्वास्थ्य केंद्र म घलो महतारी एक्सप्रेस म लगातार घंटी बजत रहिस हे। स्वास्थ्य केंद्र म पदस्थ डॉक्टर एसके शुक्ला ह फोन रिसीव करिस त पता चलिस के ग्राम सरईडीह म एक महिला गर्भवती हे जे ह प्रसव पीड़ा म तड़प रिहिस हे। डॉक्टर ह देरी न करत हुए एंबुलेंस ल लेके प्रसूता के ले बर गांव पहुंचिस। अउ प्रसूता ल लेके अस्पताल म भर्ती कराइस। अस्पताल म नर्स ह महिला के प्रसव कराइस। जेखर बाद जच्चा-बच्चा दूनों के जान बचगे। डॉक्टर के मानवता भरे काम के सबो सराहना करत हेवय।
हाल म एंबुलेंस नइ पहुंचने म एंबुलेंस चालक के लापरवाही ले मरीज मन के मउत के मामला तूल पकड़े हुए हे। राजधानी रायपुर म एंबुलेंस के दरवाजा दो घंटा तक नइ खुलिस हे। जेखर ले दू माह के नवजात लइका के दम घुटे ले मउत हो गिस हे। धमतरी म महतारी एक्सप्रेस नइ पहुंच ले ऑटो म महिला के डिलीवरी कराय बर पड़िस। उहे भानुप्रतापपुर म एंबुलेंस चालक ह प्रसव के बाद महिला अउ नवजात ल तेज बारिस म बीच जंगल म छोड़के रवाना होगे रिहिस हे। एंबुलेंस चालक मन के ये के लापरवाही ले लोगन म काफी आक्रोस भरे हे।