कांकेर। रविवार रात पखांजूर गर्ल्स हॉस्टल म ओ बेरा म खलबली मच गे, जब खाना खात ही उहां 20 छात्रा मन ल उल्टी होय लगीस। छात्रा मन ल तत्काल उपचार बर पखांजूर हॉस्पिटल ले जाय गिस। जिहां उंखर उपचार जारी हे। मामला के जानकारी मिलत ही कांकेर जिला सिक्छा अधिकारी अस्पताल पहुंचिन अउ लइका मन के हाल चाल जानिस। लइका मन के तबीयत कइसे बिगड़ीस हे, ये बात के खुलासा अभु नहीं हो पाय हे। उहें कांग्रेस हॉस्टल म खराब खाना मिले ले छात्रा मन के बीमार होय के आरोप लगात हुए दोषी मन उपर कार्यवाई के मांग करिन हे।
पखांजूर माध्यमिक शाला के हॉस्टल म रहइया 20 छात्रा मन ल रात म खाना खाय के बाद अचानक उल्टी होय लगिस। येखर जानकारी होत ही वारडन ह छात्रा मन ल अस्पताल पहुंचाइस । फिलहाल छात्रा मन के तबीयत म सुधार होवत हे। खबर लगत ही अधिकारी मन ह अस्पताल पहुंच के छात्रा मन के हालचाल जानिस।
अनुसूचित जनजाति विभाग के सहायक आयुक्त केपी ध्रुव के कहिना हे के, उमन ल छात्रामन के बीमार होय के जानकारी मिलीस हे जेमा संबंधित अधिकारी मन ले मामला म नजर रखे बर कहे गेहे । सहायक आयुक्त के कहिना हे के इलाका म नेटवरक के समस्या के चलत पूरा जानकारी नइ मिल पाइस हे। उहें दूसर ओर हॉस्टल के वारडन के कहिना हे कि खाना म छिपकली गिर के बात बेबुनियाद हे। अगर अइसा होतिस त छात्रा मन खाना नइ खातीस।
छात्रा मन ह आरोप लगाइस के खाना म छिपकिली गिरे के वजह ले ये घटना होइस हे। फिलहाल डॉक्टर के रिपोरट आय के बाद ही मामला साफ हो पाही। उहें कांग्रेस नेता मन ह हॉस्टल म खराब खाना मिले ले छात्रा मन के बीमार होय के आरोप लगात हुए दोषी मन उपर कार्रवाई के मांग करे गिस हे।
