Jagdalpur: लाखो रुपया के ठगी करइया 3 आरोपी मन ह पकड़ाईस, पढ़व पूरा खबर

जय जोहार…. (Jagdalpur) सोशल मीडिया ले लाखो रुपया के ठगी करइया तीन आरोपी मन ल पकड़े म बोधघाट पुलिस ल सफलता मिले हे। पुलिस ह आरोपी मन करा ले लाखो के नगदी रुपया अऊ आन सामान ल घलो बरामद करे हे।

(Jagdalpur) सीएसपी हेमसागर सिदार ह बताईस कि बीते अगस्त महिना म प्रार्थी दरबारा सिंह ह फेसबुक के माध्यम ले कुछु लोगन मन ले दोस्ती करिन। दोस्ती करे के बाद ये लोगन मन ह विदेश ल गिफ्ट मंगा के ओला भेजे अऊ गिफ्ट म कस्टम ड्यूटी के बहाना अलग-अलग किस्त म 27 लाख 75 हजार 700 रुपया अपन खाता म जमा करा लिस।

कुछु दिन बाद प्रार्थी ल ठगी के अहसास होय म दरबारा सिंह ह ए मामला के रिपोर्ट ल बोधघाट थाना म दर्ज कराईस। मामला ह दर्ज होवत ही बस्तर पुलिस अधीक्षक दीपक कुमार झा के दिशा-निर्देश म बोधघाट टीआई राजेश मरई अऊ निरीक्षक धनंजय सिन्हा के नेतृत्व म एकठन टीम के गठन करे गिस, जेखर बाद टीम ह मामला के जांच सुरू करिन।

ए दौरान मिले पुख्ता सबूत के आधार म पुलिस टीम ल आरोपी मन के दिल्ली म होय के सूचना मिलिस। जेकर बाद पुलिस ह तीनो आरोपी शोभराज थापा (37 वर्ष), रेणुका पोंडेले (33 वर्ष) अऊ राजू हितांग (26 वर्ष) ल गिरफ्तार कर ले हे। (Jagdalpur) सीएसपी हेमसागर सिदार ह बताईस कि ये तीनो आरोपी मन ह मूलत: नेपाल के रहवइया हे। जे मन ह बीते 4-5 साल ले दिल्ली म रहत रिहिन। पुलिस ह आरोपी मन के कब्जा ले 1.5 लाख रुपया नगद, 1 पासपोर्ट, 5 मोबाइल, 7 सिम कार्ड, 2 पासबुक, 2 चेकबुक, अलग-अलग बैंक के 10 एटीएम कार्ड, ड्राइविंग लाइसेंस, आधार कार्ड, पेन कार्ड ल बरामद करे हे।