godhan nyay yojana : मुख्यमंत्री ह काली हितग्राही मन ल 5 करोड़ 24 लाख रुपिया के करही भुगतान

जय जोहार। (godhan nyay yojana) मुख्यमंत्री भूपेश बघेल ह 20 अगस्त के पूर्व प्रधानमंत्री भारत रत्न स्वर्गीय राजीव गांधी के जयंती के अवसर म मुख्यमंत्री निवास कार्यालय म आयोजित वर्चुअल कार्यक्रम ले गोधन न्याय योजना के तहत पसुपालक ग्रामीण, गौठान ले जुड़े महिला समूह अउ गौठान समिति ल 5 करोड़ 24 लाख रुपिया ऑनलाइन जारी करही, जेमा 1 अगस्त ले 15 अगस्त तक राज्य के गौठान म पसुपालक ग्रामीण, किसान, भूमिहीन मन ले ख़रीदे गोबर के एवज म 2.24 करोड़ रुपिया के भुगतान, गौठान समिति ल 1.58 करोड़ अउ महिला समूह ल 1.02 करोड़ रुपिया के लाभांस सामिल हे ।

गोधन न्याय योजना (godhan nyay yojana) के तहत राज्य म अब तक हितग्राही मन ल 330 करोड़ रुपिया के भुगतान करे गेहे, जेमा 18 करोड़ रुपिया के बोनस रकम घलो सामिल हे । 20 अगस्त के 5.24 करोड़ के भुगतान के बाद ये आंकड़ा 335 करोड़ 24 लाख रुपिया हो जाही। गोधन न्याय योजना के तहत छत्तीसगढ़ राज्य के गौठान म 2 रुपिया किलो के दर ले गोबर अउ 4 रुपिया लीटर के दर ले गौमूत्र के खरीदी करे जात हे । गौठान म 31 जुलाई तक क्रय करे गोबर के एवज म गोबर बेचइया ग्रामीण मन ल 155.60 करोड़ रुपिया के भुगतान घलो करे जा चुके हे ।

20 अगस्त के गोबर विक्रेता ल 2.64 करोड़ रुपिया के भुगतान होय के बाद ये आंकड़ा बढ़के 158.24 करोड़ रुपिया हो जाही । गौठान समिति अउ महिला स्व-सहायता समूह ल अब तक 151.60 करोड़ रुपिया के भुगतान करे जा चुके हे, गौठान समिति अउ स्व-सहायता समूह ल 20 अगस्त के 2.60 करोड़ रुपिया के भुगतान के बाद ये आंकड़ा बढ़के 154.02 करोड़ रुपिया हो जाही ।