godhan nyay yojana: मुख्यमंत्री ह काली हितग्राही मन ल 5 करोड़ 35 लाख रुपिया के करही भुगतान

जय जोहार। (godhan nyay yojana) मुख्यमंत्री भूपेश बघेल ह 8 नवम्बर के मुख्यमंत्री निवास कार्यालय म गोधन न्याय योजना के रासि अंतरण बर आयोजित वर्चुअल कार्यक्रम के माध्यम ले पशुपालक ग्रामीण, गौठान ले जुड़े महिला समूह अउ गौठान समिति ल 5 करोड़ 35 लाख रुपिया ऑनलाइन जारी करही,जेमा 15 अक्टूबर ले 31 अक्टूबर तक गौठान म पशुपालक ग्रामीण, किसान, भूमिहीन मन ले ख़रीदे 2.35 लाख क्विंटल गोबर के एवज म 4.69 करोड़ रुपिया के भुगतान, गौठान समिति ल 39 लाख अउ महिला समूह ल 27 लाख के लाभांस रासि सामिल हे।

गोधन न्याय योजना के तहत राज्य म हितग्राही मन ल 356 करोड 17 लाख के भुगतान करे जा चुके हे, जेमा 18 करोड़ रुपिया के बोनस रासि घलो सामिल हे । 8 नवम्बर के 5.35 करोड़ के भुगतान के बाद ये आंकड़ा 361 करोड़ 52 लाख रुपिया हो जाही । गोधन न्याय योजना के तहत छत्तीसगढ़ के गौठान म 2 रुपिया किलो के दर ले गोबर के खरीदी ल करे जात हे ।

गौठान म 15 अक्टूबर तक खरीदे 87.29 लाख क्विंटल गोबर के एवज म ग्रामीण मन ल 174.58 करोड़ रुपिया के भुगतान घलो करे जा चुके हे । 8 नवम्बर के गोबर विक्रेता मन ल 4.69 करोड़ के भुगतान होय के बाद ये आंकड़ा बढ़के 179.28 करोड़ रुपिया हो जाही ।