Raipur : मुख्यमंत्री ह मोबाइल जन सेवा वाहन के करीन उद्घाटन

जय जोहार। (Raipur) राजनांदगांव जिला के विकासखंड डोंगरगांव के ग्राम अर्जुनी के भेंट मुलाक़ात कार्यक्रम म शनिवार के मुख्यमंत्री भूपेश बघेल ह राजीव युवा मितान क्लब के माध्यम ले जनसेवा के दिसा म एक ठीन अउ सुनहरा पहल करे हे । ग्रामीण अउ आम नागरिक ल स्वास्थ्य सेवा मुहैया कराय बर मोबाइल जन सेवा वाहन चलाये जाही। एखर उद्घाटन मुख्यमंत्री ह करीन ।

ए मोबाइल यूनिट म राजीव युवा मितान क्लब के सदस्य मन के डहार ले गांव अउ दूसर स्थान म सिविर लगाके नेत्र जांच अउ रक्तदान के सेवा मुहैया कराय जाही। एखर अंतर्गत राजीव युवा मितान क्लब ल मोबाइल जन सेवा वाहन सासन डहार ले प्रदान करे गेहे । जेमा नेत्र क्लीनिक अउ ब्लड बैंक बर रक्तदान के माध्यम ले ब्लड इकट्ठा करे के काम करे जाही।

आंख के जांच बर एमा मैनुअल लेंस चेकिंग के संगेसंग ऑटोरेफ अउ स्लाईट लैम्प मशीन घलो उपलब्ध हे, जेखर ले आंख के कंप्यूटराइज्ड आई चेकअप अउ आंख के अंदरूनी हिस्सा के जांच घलो करे जाही ।