CM Bhupesh Baghel ह राजिम म भगवान श्री राम के भव्य मूर्ति के करीन अनावरण
जय जोहार । सीएम भूपेश बघेल (CM Bhupesh Baghel) ह आज राजिम महोत्सव स्थल म भगवान श्री राम के 25 फीट ऊंची भव्य मूर्ति के अनावरण करीन। ए मूर्ति ल 5 महीना के अल्प बेरा म तईयार करे गेहे । ए भव्य अउ विशाल मूर्ति ल तईयार करे म ओड़िसा के 20 सिल्पकार मन ह मुख्य भूमिका निभाईन हे । एला हाथ ले तराश के छत्तीसगढ़ के बिल्हा स्टोन ले निर्मित करे गेहे ।
ए मूर्ति ल 8 फीट ऊंचा नवनिर्मित चबूतरा म प्रतिस्थापित करे गेहे । एखर भव्यता ल देखत ही बनत हे । सीएम भूपेश बघेल ह श्री राजीव लोचन मंदिर पहुंचके पूजा अर्चना करीन अउ प्रदेस के खुसहाली अउ समृद्धि के कामना करे हे। ए अवसर म मुख्यमंत्री श्री बघेल ह राजिम-चौबेबांधा-नवागांव मार्ग चौड़ीकरण, सुदृढ़ीकरण अउ 3.7 किलोमीटर लंबा लक्ष्मण झूला पहुंच मार्ग के भूमिपूजन करीन ।
उल्लेखनीय हे कि राम वनगमन पर्यटन परिपथ के अंतर्गत त्रिवेणी संगम राजिम घलो सामिल हे । राज्य सासन डहार ले राजिम म राम वनगमन पर्यटन परिपथ के विकास बर 13 करोड़ 12 लाख रुपिया के स्वीकृति दे गेहे । ए अवसर म गृह मंत्री ताम्रध्वज साहू, छत्तीसगढ़ टूरिज्म बोर्ड के अध्यक्ष अटल श्रीवास्तव, उपाध्यक्ष चित्ररेखा साहू, गौ सेवा आयोग के अध्यक्ष महंत राम सुंदर दास उपस्थित रिहीन ।
