Raipur : जनता ले करे सबो वादा ल पूरा करत हन – भूपेश बघेल

जय जोहार। (Raipur) सीएम भूपेश बघेल ह किहीन कि राज्य सरकार ह जनता ले करे हरेक वादा ल पूरा करत हे। भेंट-मुलाकात कार्यक्रम देस के पहलइया कार्यक्रम हे, जेमा मुख्यमंत्री ह स्वयं जनता के बीच जाके योजना के जमीनी हकीकत जानत हे। भेंट मुलाकात कार्यक्रम ह 4 मई ले सुरू होए हे, अब तक दो तिहाई ले जादा विधानसभा म ए कार्यक्रम के आयोजन हो चुके हे।

वोहा किहीन कि हमन ह जनता ले जेन घलो वायदा करे हन , वो सबो ल पूरा करत हन। जनता के हित म अइसे कई कल्याणकारी योजना ल घलो लागू करे गेहे। जेन वादा नई करे गे रिहीन। मुख्यमंत्री ह आज बलौदाबाजार विधानसभा के ग्राम पुरैना-खपरी म भेंट-मुलाकात कार्यक्रम ल सम्बोधित करत रिहीन।

सीएम भूपेश बघेल ह किहीन कि मेहा भेंट-मुलाकत कार्यक्रम म सरकार के कल्याणकारी योजना के जमीनी स्तर म क्रियान्वयन के जानकारी ले ल, हितग्राही ले मिले ल, आमजन के हालचाल जाने बर पुरैना-खपरी आए हंव। सीएम ह किहीन कि सरकार बनत ही सबले पहले हमन ह किसान मन के ऋण माफी करीन। छत्तीसगढ़ सबले पहलइया राज्य हे, जिहां किसान मन ले समर्थन मूल्य अउ इनपुट सब्सिडी मिलाके धान के सबले जादा मूल्य मिलत हे। अब तक राजीव गांधी किसान न्याय योजना के 3 किस्त दे जा चुके है अउ चौथा किस्त ल 31 मार्च के पहले दे जाही ।

मुख्यमंत्री ह कार्यक्रम स्थल म छत्तीसगढ़ महतारी के छायाचित्र म पुष्प अर्पित कर, राज्यगीत अरपा पैरी के धार के गायन ले भेंट-मुलाकात कार्यक्रम के सुरुवात करीन। इंहा वोहा हितग्रही मन ल सामग्री अउ सहायता रासि के चेक वितरित करीन। ए दउरान पूर्व सासंद छाया वर्मा, संसदीय सचिव शकुंतला साहू अउ बिलाईगढ विधायक चंद्रदेव राय, छत्तीसगढ़ पाठ्य पुस्तक निगम के अध्यक्ष शैलेष नितिन त्रिवेदी घलो उपस्थित रिहीन ।