Raipur : परिवहन मंत्री मोहम्मद अकबर ह करीन विभाग म चालान भुगतान बर यूपीआई आधारित क्यूआर बेस्ड भुगतान सुविधा के सुरुवात

जय जोहार । परिवहन विभाग डहार ले विभाग के काम म पारदर्शिता अउ मनखे मन के सुविधा ल धियान म रखत हुए सरलग कदम उठाए जावत हे । ए कड़ी म आज परिवहन मंत्री मोहम्मद अकबर ह शंकर नगर के अपन सासकीय निवास कार्यालय म आयोजित कार्यक्रम म यूपीआई आधारित क्यूआर बेस्ड भुगतान सुविधा के सुरुवात करीन । चालानी कार्रवाई म पारदर्शिता बर पीओएस मशीन के उपयोग होही । विभाग डहार ले आज मोबाइल वे-पैड ले ओवरलोड गाड़ी म चालान प्रक्रिया के सुरुवात घलो करे गीन।

ए दउरान परिवहन मंत्री श्री अकबर ह बताइन कि प्रदेस म ओवर लोड गाड़ी के चेकिंग बर 7 मोबाइल वे-ब्रिज के व्यवस्था करे गेहे। एखर ले प्रवर्तन अमला डहार ले कोनो गाड़ी के वजन कराए जा सकही अउ प्रवर्तन म पारदर्शिता आही । पीओएस के माध्यम ले ऑनलाइन चालान होए ले प्रवर्तन म पारदर्शिता आही।

यूपीआई आधारित क्यूआर कोड के माध्यम ले भुगतान करे के नवा सुविधा घलो सुरू करे जावत हे । ओवरलोड गाड़ी ले जिहां सासन ल राजस्व के नुकसान होत हे , उंहे सड़क घलो बेरा ले पहले खराब हो जात हे । अब ए ओवर लोड गाड़ी म लगाम लगाए बर परिवहन विभाग ह मोबाइल वे-ब्रिज खरीद लेहे । परिवहन विभाग के सबो फ्लाइंग स्क्वाड ल मोबाइल वे-ब्रिज दे जावत हे । एखर ले माल वाहक गाड़ी के वजन चेक करे जा सकही ।