जय जोहार । सीएम भूपेश बघेल ह रायपुर ग्रामीण म भेंट मुलाकात के दउरान आज नगर पंचायत माना कैम्प जल आवर्धन योजना के भूमिपूजन करीन । लगभग साढ़े 44 करोड़ रुपिया के लागत के ये योजना 27 माह म पूरा होही । जल आवर्धन योजना के माध्यम ले माना कैम्प के 3 हज़ार 2 सौ घरों तक पीने के साफ पानी पहुंचही । ए अवसर म मुख्यमंत्री श्री बघेल ह माना कैम्प म खुलइया नवा महाविद्यालय का नाव प्रियदर्शनी इंदिरा गांधी महाविद्यालय करे के घोसना करीन ।
ए मउका म रायपुर ग्रामीण के विधायक सत्यनारायण शर्मा, नगर निगम रायपुर के महापौर ऐजाज ढेबर अउ जिला सहकारी केन्द्रीय बैंक रायपुर के अध्यक्ष पंकज शर्मा समेत कई झन जनप्रतिनिधि अउ गणमान्य नागरिक उपस्थित रिहीन ।
मुख्यमंत्री ह माना म जल आवर्धन योजना के भूमिपूजन समारोह म सम्बोधित करत हुए किहीन कि ए योजना के पूरा होए ले सबो घर म पेयजल के आपूर्ति सुनिश्चित होही अउ बिसेस रूप ले हमर बहिनी ल एखर लाभ मिलही । वोहा किहीन कि माना कैम्प ल इंदिरा जी ह बसाए रिहीन। ओखर स्नेह इंहा के मनखे मन ल मिलीन । तब ले ये क्षेत्र सरलग उन्नति अउ प्रगति करत हे ।
उल्लेखनीय हे कि माना कैम्प म बनइया जल आवर्धन योजना के तहत दू ठन नवा ओवर हेड टैंक बनाए जाही । संग ही लगभग 65 हज़ार मीटर पाइपलाइन घलो बिछाए जाही । ए जल आवर्धन योजना के पूरा होए ले माना कैम्प वासी मन ल भू-जल स्त्रोत म निर्भरता कम होही । ए योजना बर पानी के आपूर्ति नगर निगम रायपुर ले होही ।
