शहनाई गार्डन म इकट्ठा होइन छत्तीसगढ़ी सिनेमा के दिग्गज, बेरा रिहिस सक्सेस पार्टी के, जानव कोन फिलिम रिहिस

मंगलवार संझा वो फिलिम के सक्सेस पार्टी आयोजित करे गिस जेन ह सफलता के झंडा गाड़ दिए, जी हां ओखर नाम हे “ले शुरू होगे मया के कहानी” ये फिलिम ह 5 मई ले अपन शुरूआत करिस अऊ देखत-देखत लोगन मन के दिल म अईसे बस गे कि लोगन मन ओला बार-बार देखे बर सिनेमा घर पहुंचत हें। ये फिलिम ह कई ठन मिथक ल तोड़ दे हे जेमा बहुत सारा बात हे वो फेर कभू होही।

फिलहाल बात सक्सेस पार्टी के जिंहा पहुंचे रिहिन निर्माता छोटे लाल साहू, निर्देशक सतीश जैन, अनुमोद राजवैद्य, अलख राय, पवन तातेड़, चंदन दीप, दिनेश साहू, लकी रंगशाही, राज वर्मा, ताबिर हुसैन अऊ तमाम यूट्यूबर मन। सब्बो के उपस्थिति म शहनाई गार्डन के प्रांगण में केक काटे गिस अऊ फिलिम के सफलता बर खुशियां मनाए गिस।

शहनाई गार्डन एक अइसे जगह हे जिंहा छालीवुड के सदस्य मन के जमघट होवत रहिथे, ये मौका म निर्माता व अभिनेता दिनेश साहू ह निर्देशक सतीश जैन ल बधाई देत हुए छालीवुड के ग्लूकोज मैन किहिस, ओखर अनुसार सतीश जैन अइसे शख्सियत हे जेन हमेशा छत्तीसगढ़ी सिनेमा म जान फूंके के काम करथे, सबो झन निर्माता छोटे लाल साहू अऊ निर्देशक सतीश जैन ल सफलता बर बधाई दिन अऊ अइसे अल्टीमेट फिलिम बनाए बर दिल से शुभकामना प्रेषित करिन।