जय जोहार । छत्तीसगढ़ म पहली घांव ‘राष्ट्रीय रामायण महोत्सव’ के भव्य आयोजन करे जावत हे । मुख्यमंत्री भूपेश बघेल ह 1 जून के अपरान्ह 3 बजे रायगढ़ के ऐतिहासिक रामलीला मैदान म ऐखर सुभारंभ करही । ए राष्ट्रीय महोत्सव म देस के 12 राज्य सहित कंबोडिया अउ इंडोनेशिया के रामायण दल कोती ले रामकथा म भक्तिपूर्ण प्रस्तुति दे जाही ।
ए रामायण दल मन के प्रस्तुति म सर्वव्यापी भगवान श्रीराम के रामकथा के विविधतापूर्ण राष्ट्रीय-वैश्विक स्वरूप के झलक देखे ल मिलही । रामायण के अरण्य काण्ड म रामायण दल मन के प्रतियोगिता प्रतिदिन आयोजित करे जाही । संग ही राष्ट्रीय स्तर म ख्याति प्राप्त कलाकार भजन संध्या म अपन संगीतमय प्रस्तुति दिही । रामलीला मैदान म तीन दिन तक रामकथा के अविरल भावधारा बही । ए राष्ट्रीय महोत्सव म केरल, कर्नाटक, ओड़िसा, असम, गोवा, पश्चिम बंगाल, उत्तर प्रदेश, हिमाचल प्रदेश, महाराष्ट्र, झारखण्ड, मध्यप्रदेश अउ छत्तीसगढ़ के रामायण दल सामिल होवत हे । राष्ट्रीय रामायण महोत्सव के अंतिम दिन हिन्दी के प्रख्यात कवि कुमार विश्वास अपन विशेष प्रस्तुति ‘अपने-अपने राम म्युजिक नाईट’ ले भगवान श्रीराम के महिमा के बखान करही ।
राष्ट्रीय रामायण महोत्सव के सुभारंभ समारोह म पंडित, पुरोहित अउ स्थानीय कलाकार कोती ले हनुमान चालीसा के सामूहिक पाठ करे जाही । संग ही छत्तीसगढ़ म आमंत्रित विदेसी अउ अन्तर्राज्यीय कलाकार मन कोती ले आकर्षक मार्च पास्ट करे जाही । ‘‘राष्ट्रीय रामायण महोत्सव‘‘ के सुभारंभ समारोह के अध्यक्षता संस्कृति मंत्री अमरजीत भगत करही । ए अवसर म स्कूल शिक्षा मंत्री अउ रायगढ़ जिला के प्रभारी मंत्री डॉ. प्रेमसाय सिंह टेकाम, खेल अउ युवा कल्याण मंत्री उमेश पटेल, विधायक लालजीत सिंह राठिया, प्रकाश नायक, चक्रधर सिंह, जिला पंचायत रायगढ़ के अध्यक्ष निराकार पटेल, नगर पालिक निगम के महापौर श्रीमती जानकी काटजू विशिष्ट अतिथि के रूप म उपस्थित रही ।
पहला दिन के आकर्षण: कंबोडिया के रामायण दल के होही प्रस्तुति
आयोजन के पहला दिन मंझनिया 2 बजे से 3 बजे तक जसगीत गायक देवेश शर्मा ह प्रस्तुति दिही । संझा 4.30 बजे से 5 बजे तक कंबोडिया के दल कोती ले प्रस्तुति दे जाही । एखर बाद संझा 5.15 बजे अन्तर्राज्यीय रामायण मंडली मन के मध्य अरण्यकाण्ड म आधारित प्रतियोगिता आयोजित करे जाही , जेमा उत्तराखंड, कर्नाटक, छत्तीसगढ़ के दल हिस्सा लिही । भजन संध्या म रात्रि 7.30 बजे से 9 बजे तक ख्यातिप्राप्त राष्ट्रीय कलाकार सण्मुख प्रिया (इंडिययन आइडल) अउ रात्रि 9 बजे ले 10.30 बजे तक ख्यातिप्राप्त राष्ट्रीय कलाकार शरद शर्मा (सा रे गा मा) ह भजन प्रस्तुत करही ।
दूसरे दिन के आकर्षण: बाबा हंसराज रघुवंशी अउ लखबीर सिंह लक्खा के प्रस्तुति
राष्ट्रीय रामायण महोत्सव के दूसर दिन के मंचीय कार्यक्रम मंझनिया 2 बजे ले प्रारंभ होही , संस्कृति मंत्री अमरजीत भगत ह कार्यक्रम के मुख्य अतिथि होही अउ स्कूल शिक्षा मंत्री डॉ. प्रेमसाय सिंह टेकाम कार्यक्रम के अध्यक्षता करही । कार्यक्रम म मंझनिया 2.15 बजे हनुमान चालीसा के सामूहिक पाठ होही अउ मंझनिया 2.30 ले रात्रि 8.30 बजे तक आयोजित अरण्यकाण्ड म आधारित प्रतियोगिता म 8 राज्य झारखण्ड, महाराष्ट्र, मध्यप्रदेश, असम, ओड़िसा, हिमाचल प्रदेश, गोवा अउ छत्तीसगढ़ के दल हिस्सा लिही । भजन संध्या म रात्रि 8.30 बजे ले 9.30 बजे तक ख्यातिप्राप्त राष्ट्रीय कलाकार बाबा हंसराज रघुवंशी अउ रात्रि 9.30 बजे ले 10.30 बजे तक लखबीर सिंह लक्खा भजन के प्रस्तुति दिही ।
तीसर दिन के आकर्षण: इंडोनेशिया के रामायण दल के प्रस्तुति
राष्ट्रीय रामायण महोत्सव के तीसर दिन समापन समारोह के आयोजन मुख्यमंत्री भूपेश बघेल के मुख्य आतिथ्य म होही । कार्यक्रम के अध्यक्षता संस्कृति मंत्री अमरजीत भगत करही । महोत्सव के तीसर दिन मंझनिया 2 बजे ले संझा 6 बजे तक अरण्यकाण्ड म आधारित प्रतियोगिता आयोजित करे जाही , जेमा 4 राज्य केरल, उत्तरप्रदेश, पश्चिम बंगाल अउ छत्तीसगढ़ के दल हिस्सा लिही । संझा 6 बजे ले 6.30 बजे तक कंबोडिया के दल प्रस्तुति दिही । संझा 6.30 बजे ले 7 बजे तक केलो महाआरती के आयोजन होही , जेमा महिला स्व-सहायता समूह के बहिनी गोबर निर्मित दिया ले दीपदान करही ।
रात्रि 7 बजे ले मंचीय कार्यक्रम सुरु होही , जेमा हनुमान चालीसा के सामूहिक पाठ करे जाही । राष्ट्रीय रामायण महोत्सव के समापन समारोह रात्रि 7.30 बजे ले 8.30 बजे तक आयोजित करे जाही , जेमा विजेता दल ल पुरस्कार वितरण करे जाही । एखर संग ही विदेशी कलाकार अउ प्रतियोगिता के निर्णायक ल घलो सम्मानित करे जाही । ए अवसर म विजेता दल अउ विदेसी कलाकार ह प्रस्तुति दिही । रात्रि 8.30 बजे ले 9 बजे तक इंडोनेशिया के दल के प्रस्तुति होही । भजन संध्या म रात्रि 9 बजे ले 9.30 बजे तक ख्यातिप्राप्त राष्ट्रीय कलाकार मैथिली ठाकुरअउ 9.30 बजे ले 10 बजे तक ख्यातिप्राप्त राष्ट्रीय कलाकार कुमार विश्वास ह ‘अपने-अपने राम म्युजिक नाईट’ के प्रस्तुति दिही ।छत्तीसगढ़ के लोक गायक दिलीप षड़ंगी ह अपन टीम के संग महोत्सव के तीनो दिन हनुमान चालीसा के पाठ करही।
