केलो महाआरती म संघरिन मुख्यमंत्री भूपेश बघेल, प्रदेश के खुशहाली के करिन कामना

रायगढ़ म होवत राष्ट्रीय रामायण महोत्सव के बेरा म मुख्यमंत्री भूपेश बघेल ह केलो मईय्या के आरती कर प्रदेश के समृद्धि अऊ खुशहाली के कामना करिन। केलो उद्धार समिति अऊ सर्व समाज के लोगन मन ए बेरा म मुख्यमंत्री के स्वागत करिन। मुख्यमंत्री ह गौ माता ल चारा खिलाईन अऊ गोधन के समृद्धि के कामना करिन। संग म मुख्यमंत्री बघेल ह गोबर के दिया के दीपदान घलो करिन।

ए बेरा म केलो मईय्या के जयकारा ले पूरा घाट गूंज गे अऊ लोगन मन भक्ति भाव ले सराबोर दिखिन। जगमग दिया के संगे-संग महाआरती के भव्यता देखत बनत रिहिस। ए बेरा म संस्कृति मंत्री अमरजीत भगत अऊ स्कूल शिक्षा मंत्री डॉ. प्रेमसाय सिंह टेकाम, उच्च शिक्षा मंत्री उमेश पटेल, गौ सेवा आयोग के अध्यक्ष राजेश्री महंत रामसुंदर दास, विधायक चक्रधर सिंह घलो ए महाआरती म संघरे रिहिन।