भाजपा केन्द्रीय नेता मन के छत्तीसगढ़ दौरा, अमित शाह दुर्ग त जेपी नड्डा बिलासपुर म करहीं सभा

भाजपा के तीन बड़का केंद्रीय नेता मन के जून म दौरा प्रस्तावित हे। राष्ट्रीय अध्यक्ष जेपी नड्डा बिलासपुर, केंद्रीय गृहमंत्री अमित शाह दुर्ग अऊ केंद्रीय मंत्री गिरीराज सिंह बस्तर म संभागीय बैठक लिहीं अऊ सभा करहीं। केंद्रीय मंत्री केंद्र सरकार के योजना मन के समीक्षा के संगे-संग संगठन बर दिशा निर्देश घलो दिहीं। गिरीराज सिंह आठ अऊ नौ जून के बस्तर प्रवास म रही। ए पहिली मउका आए जब भाजपा सरकार के कोनों केंद्रीय मंत्री बस्तर म रात्रि विश्राम करही। उहें अमित शाह 22 जून के दुर्ग अऊ जेपी नड्डा 30 जून के बिलासपुर आवत हे।

केंद्र के मोदी सरकार के नौ बछर के उपलब्धि ल लेके भाजपा ह एक महीना बर महासंपर्क अभियान चलावत हे। ए अभियान म संघरे बर केन्द्रीय नेता मन छत्तीसगढ़ पहुंचत हे। विधानसभा चुनाव के हिसाब ले भाजपा के राष्ट्रीय अध्यक्ष जोपी नड्डा अऊ केंद्रीय मंत्री अमित शाह के बस्तर दौरा हो चुके हे। शाह ह नक्सली मन ल चुनौती देत लोकसभा चुनाव के ठीक पहिली तक ओखर सफाया के फरमान घलो सुना दिन। अब शाह ह दुर्ग संभाग म सभा करही। दुर्ग संभाग के 20 विधानसभा सीट म अभी के बेरा म 18 म कांग्रेस के कब्जा हे। इहां ले मुख्यमंत्री भूपेश बघेल के अलावा उंखर मंत्रिमंडल म पांच मंत्री ताम्रध्वज साहू, रविंद्र चौबे, गुरु रुद्र, मोहम्मद अकबर अऊ अनिला भेडिया हे। अईसे में शाह चुनावी सभा कर कांग्रेस के किला ल भेदे के रणनीति तियार करही।

अमित शाह के बछर 2014 ले दुर्ग म नजर हे। ए चुनाव म भाजपा ल सिरिफ एक दुर्ग लोकसभा सीट म हार के सामना करना पड़े रिहिस। ए बात भले बितर हे कि इहां 2019 के चुनाव म भाजपा ह दुर्ग म जीत दर्ज कर लिस, फेर ओखर पहिली 2018 म होए विधानसभा चुनाव म पार्टी प्रत्याशी मन ल जबर हार के सामना करे बर पड़े रिहिस। उहें बिलासपुर म राष्ट्रीय अध्यक्ष जेपी नड्डा के सभा 30 जून म प्रस्तावित हे। संभाग के 24 विधानसभा सीट म सात म भाजपा के विधायक हे। पाछू के चुनाव म भाजपा के ओ बेरा के प्रदेश अध्यक्ष अध्यक्ष धरमलाल कौशिक बिलासपुर संभाग ले आथे, एखरे सती कांग्रेस के लहर के बाद घलो पार्टी के सात विधायक मन ल जीत मिले रिहिस।

में जब बस्तर गे रेहेंव तब कहे जात रिहिस कि प्रधानमंत्री अवईया हे। इहां आएंव त पता चलिस केन्द्रीय गृहमंत्री आवत हे। मीडिया ले पता चलत हे कि नड्डा जी घलो आवत हे। चुनाव के बेरा ए एखर सती जम्मो आही। 4 महीना बाकी हे एखर सती जम्मो आके प्रदेश सरकार के काम बुता ल देखहीं।

भूपेश बघेल, मुख्यमंत्री छत्तीसगढ़ (मीडिया ले चर्चा के बेरा म)