जानव का हे एखर खासियत अऊ कब करना चाही ट्रिप प्लान
सतीश साहू, जगदलपुर
छत्तीसगढ़ के सुरम्य बस्तर जिला म स्थित चित्रकोट जलप्रपात एक अईसे प्राकृतिक आश्चर्य आए जेखर बर एशिया के सबले चौड़ा झरना होए के तमगा लगाए जाथे। मानसून के बेरा म चित्रकोट वॉटर फॉल के अनुभव एकदम नवा अऊ अलग होथे। जेन ह प्रकृति के शक्ति अऊ सुंदरता के अनुपम छटा ल दर्शाथे। ए जलप्रपात गोदावरी के सहायक इंद्रावती नदी म स्थित हे। एखर सुंदरता ल निहारे बर दूर-दूर ले लोगन मन खींचे चले आथे।
ए झरना बस्तर संभाग के जिला मुख्यालय जगदलपुर ले लगभग 38 किलोमीटर दूर पश्चिम दिशा म स्थित हे। एला भारत के नियाग्रा फॉल घलो कहे जाथे। जुलाई ले अक्टूबर तक मानसून के बारिश ले इंद्रावती नदी ह उफान म रहिथे अऊ ए बेरा म एखर सुंदरता देखे के लायक होथे। काबर कि इंद्रावती के पानी ह झरना के रूप म इहां ले बहथे। ए झरना लगभग 300 मीटर (980 फीट) चौड़ाई म फैले हे। अऊ गगनभेदी गर्जना के संग 30 मीटर (98 फीट) नीचे कुंड म झर-झर झर-झर गिरथे।
का हे एखर सांस्कृतिक महत्व
चित्रकोट जलप्रपात न सिरिफ प्राकृतिक आकर्षण के केन्द्र हे बल्कि एखर सांस्कृतिक अऊ ऐतिहासिक मानता घलो हे। झरना तीर-तखार के इलाका म आदिवासी समुदाय के लोगन मन निवास करथे अऊ ओमन ए झरना ल बड़ पवित्र मानथे। स्थानीय किंवदंती अऊ लोक कथा ह ए झरना के गहराई ले जुड़े हे। चित्रकोट जलप्रपात के आसपास के इलाका प्राचीन मंदिर अऊ पुरातात्विक स्थल ले घलो भरपूर हे। जेन ह ए क्षेत्र के समृद्ध इतिहास के झलक ल पेश करथे। एमा ऐतिहासिक दंतेश्वरी मंदिर घलो संघरे हे, जेन आदिवासी समुदाय के बीच पूजनीय देवी दंतेश्वरी ल समर्पित हे।
कब जाना चाही चित्रकोट जलप्रपात
मानसून म चित्रकोट के पर्यटन बर अगस्त, सितंबर अऊ अक्टूबर के महीना सबले अच्छा माने जाथे। बारिश के बाद पूरा क्षेत्र हरा-भरा व घना रुखराई ले जीवंत हो उठथे। मानसून के बाद ए क्षेत्र बेहद खूबसूरत दिखाई देथे अऊ इही बेरा म प्रकृति के सबले करीब जुड़े के मउका मिलथे।
जलप्रपात पहुंचे के रद्दा
चित्रकोट जलप्रपात बेहतर सड़क मार्ग ले जुड़े हे। एखर सति ए छत्तीसगढ़ अऊ दूसर पड़ोसी राज्य के प्रमुख शहर ले इहां पहुंचे जा सकत हे। इहां के निकटतम शहर जगदलपुर ह ए झरना के प्रवेश दुआर के रूप म काम करथे। इहां के निकटतम रेलवे स्टेशन घलो जगदलपुर म ही हे। इहां रुके बर आप मन ल बजट होटल मन ले लेके मिड-केटेगरी के रिसॉर्ट्स घलो मिल जाही। टूरिस्ट झरना के तीरन प्राकृतिक रिसॉर्ट्स अऊ गेस्टहाउस म रहे के विकल्प घलो चुने जा सकत हे।
