डीजल ले एक्साइज ड्यूटी खतम, पेट्रोल ₹10 सस्ता—केंद्र के फैसला के मुख्यमंत्री विष्णुदेव साय हर करिन स्वागत
“मुख्यमंत्री हर कहिन—140 करोड़ मनखे मन ल सीधा राहत देवइया ऐतिहासिक फैसला, प्रधानमंत्री के संवेदनशीलता अउ दूरदर्शिता के चिनहा आय।”
रायपुर. केंद्र सरकार कोती ले डीजल ल एक्साइज ड्यूटी ले मुक्त करे अउ पेट्रोल म ₹10 प्रति लीटर के कटौती करके एक्साइज ड्यूटी ल सिरिफ़ ₹3 रखे के फैसला के मुख्यमंत्री विष्णुदेव साय हर स्वागत करे हें। ओमन एला देश के 140 करोड़ मनखे मन ल सीधा राहत पहुंचाए वाला ऐतिहासिक अउ जनहितकारी कदम बताए हें।
मुख्यमंत्री श्री साय हर कहिन कि :”ए फैसला ले देश के हर परिवार, किसान, मजदूर अउ मध्यमवर्ग के लोगन मन ल बड़े राहत मिलही। दुनिया भर म चलत संकट के बाद घलो केंद्र सरकार आम जनता ऊपर कोनो अतरिक्त बोझ नई बने देवय, ये प्रधानमंत्री के संवेदनशीलता अउ दूरदर्शिता के परमान आय, जेकर ले आमजन के जिनगी म सीधा असर पड़ही।”
मुख्यमंत्री श्री साय हर ए बड़े फैसला बर छत्तीसगढ़ के जम्मों जनता कोती ले प्रधानमंत्री नरेंद्र मोदी ल गाड़ा-गाड़ा धन्यवाद अउ आभार जताइन। ओमन कहिन कि प्रधानमंत्री नरेंद्र मोदी के अगुवाई म केंद्र सरकार हर बखत जनहित ल सबले ऊपर रखके फैसला लेवत हे। ये फैसला प्रधानमंत्री के दूरदर्शिता अउ देशवासी मन के प्रति समर्पण के एक अटूट उदाहरण आय।
