जिला अस्पताल मुंगेली म 3 बछर के मासूम के गला ले सफल ऑपरेशन करके निकालिस सिक्का

ईएनटी, एनेस्थीसिया अउ पीडियाट्रिक टीम के फुर्ती ले टलिस बड़े दुर्घटना

रायपुर. जिला अस्पताल म डॉक्टर मन के सजगता अउ तुरंते इलाज के बेवस्था ले एक 3 बछर के मासूम के जान बचाय म बड़े सफलता मिले हे।

मुख्य चिकित्सा एवं स्वास्थ्य अधिकारी डॉ. शीला साहा ह बताइन कि मुंगेली विकासखंड के ग्राम कोसमतरा के रहइया 3 बछर के हिमांशी साहू ह खेलत-खेलत अचानक एक ठन सिक्का निगल गे रहिस, जेहा ओकर गला के आहार नली म जाके फँस गे। घर वाले मन बिना देरी करे लइका ल जिला अस्पताल पहुंचिन, जिहाँ एक्स-रे जाँच ले पक्का होइस कि सिक्का ह आहार नली म फँसे हे। एखर बाद डॉक्टर मन के टीम ह बिना कोनो देरी करे दूरबीन (एंडोस्कोपिक) तकनीक ले सफल ऑपरेशन करिन अउ नोनी के गला ले सिक्का ल सुरक्षित बाहर निकाल लीन।

सिविल सर्जन डॉ. एम.के. राय ह बताइन कि सही बखत म इलाज मिले के सेती नोनी ह अब सुरक्षित हे अउ पूरी तरह ले चंगा हे।

जिला अस्पताल के ईएनटी विशेषज्ञ डॉ. कमलेश सत्यपाल, निश्चेतना विशेषज्ञ डॉ. राजेश कुमार बेलदार अउ बाल रोग विशेषज्ञ डॉ. मधु ध्रुव समेत जम्मों टीम ह मिलके ए सफल ऑपरेशन ल अंजाम दीन। नोनी के परिवार वाले मन ह डॉक्टर मन अउ अस्पताल प्रबंधन के अड़बड़ आभार मानिन।