कृषि महाविद्यालय, रायपुर म उज़्बेकिस्तान यात्रा म आधारित

अंतरराष्ट्रीय मौका बर संगोष्ठी होइस

रायपुर. कृषि महाविद्यालय, इंदिरा गांधी कृषि विश्वविद्यालय, रायपुर म उज़्बेकिस्तान यात्रा ले मिले अनुभव मन ल साझा करे अउ अंतरराष्ट्रीय पढ़ाई के मौका ल बढ़ावा दे बर एक संगोष्ठी के आयोजन करे गिस। ए कार्यक्रम ह विश्वविद्यालय के अंतरराष्ट्रीय स्तर म जुड़ाव ल मजबूत करे के एक बड़े कोसिस आय।

कार्यक्रम के सुरूआत पहुना मन के स्वागत ले होइस। ओकर बाद अंतरराष्ट्रीय प्रकोष्ठ के अध्यक्ष प्रोफेसर हुलास पाठक ह 28 फरवरी ले 10 मार्च तक कुलपति जी के अगुवाई म करे गे उज़्बेकिस्तान यात्रा के अपन अनुभव बताइन। ओमन विस्तार ले बताइन कि ए यात्रा म खेती-किसानी, एग्रीबिजनेस, ग्रामीण विकास, अउ नवा सोच के क्षेत्र म कतको महत्वपूर्ण जानकारी मिलीस हे। ओमन कहिन कि आने वाला बखत म दुनो देस मन के बीच सहयोग के बड़े मौका हे।

ए संगोष्ठी के मुख्य उद्देश्य उज़्बेकिस्तान जात्रा ले मिले सीख ल विभागाध्यक्ष मन, प्राध्यापक मन अउ लइका मन तक पहुँचाना अउ ओमन ल अंतरराष्ट्रीय मौका बर जागरूक करना रहिस। संगे-संग, छात्र मन ल दुनिया भर म शिक्षा, खोज (अनुसंधान) अउ ट्रेनिंग म हिस्सा ले बर घलो प्रोत्साहित करे गिस। कार्यक्रम म छात्र अउ शिक्षक विनिमय कार्यक्रम, मिलके रिसर्च करना अउ बिदेसी विश्वविद्यालय मन के संग साझेदारी जइसन विषय मन म चर्चा होइस।

संगोष्ठी म इंदिरा गांधी कृषि विश्वविद्यालय कोति ले मिलइया आर्थिक मदद (स्कॉलरशिप) के घलो जानकारी दे गिस। लइका मन ल ‘उड़ान योजना’ के तहत बिदेस म रिसर्च अउ ट्रेनिंग के मौका अउ शिक्षक मन ल ‘उत्कर्ष योजना’ के माध्यम ले आर्थिक सहायता के बारे म बताय गिस। ए योजना मन के मकसद पइसा के कमी ल दूर करके जादा ले जादा शिक्षक अउ छात्र मन ल दुनिया के मंच म मौका देवई आय।

कार्यक्रम म कृषि महाविद्यालय रायपुर के अधिष्ठाता डॉ. आरती गुहे ह छात्र मन ल संबोधित करत कहिन कि ओमन अंतरराष्ट्रीय मंच म आगू बढ़ंय अउ छत्तीसगढ़ के नाम रोशन करंय। अधिष्ठाता छात्र कल्याण डॉ. संजय शर्मा ह अपन अनुभव बताइन कि अंतरराष्ट्रीय अनुभव ह कैरियर बनाय म बड़े भूमिका निभाथे। वरिष्ठ वैज्ञानिक डॉ. जी. के. दास ह छात्र मन ल अपन ताकत ल पहचाने अउ दुनिया भर म मिलइया मौका के फायदा उठाए बर कहिन।

कार्यक्रम म उपस्थित दूसर प्राध्यापक अउ अधिकारी मन घलो लइका मन ल अपन हुनर बढ़ाए बर प्रोत्साहित करिन। ए संगोष्ठी म अलग-अलग विभाग के विभागाध्यक्ष, शिक्षक अउ अड़बड़ संख्या म लइका मन उत्साह के संग हिस्सा लीन। कार्यक्रम के सफल संचालन डॉ. संजय द्विवेदी ह करिस अउ आखिर म डॉ. सुनील नायर ह जम्मों झन के आभार मानिन।