विशेष लेख: स्वाभिमान के नवा पहिचान: छत्तीसगढ़ मा माई लोगन मन के ताकत के सुनहरा बखत

डॉ. दानेश्वरी संभाकर, उप संचालक

रायपुर. छत्तीसगढ़ मा बछर 2026 ला “महतारी गौरव वर्ष” के रूप मा मनात हुए माई लोगन मन के सम्मान, सुवाभिमान अउ आर्थिक मजबूती ला नवा दिसा दिय जावत हवय। विष्णु देव साय के अगुवाई मा राज सरकार के योजना मन अब भुइँया स्तर मा बढ़िया असर देखावत हें, जेखर साफ़ झलक आँकड़ा मन मा दिखथे।

मुख्यमंत्री विष्णु देव साय ह किहिन कि ‘महतारी गौरव वर्ष’ माई लोगन मन ला आतमनिर्भर अउ ताकतवर बनाय के एक बड़े अभियान आय। उमन बताइन कि राज सरकार ह बजट मा महिला अउ लइका मन के पोषण अउ सुवास्थ्य ला सबले पहिली जगा दीस हे। एखर बर:

• आंगनबाड़ी संचालन बर: 800 करोड़ रूपया
• पूरक पोषण अहार बर: 650 करोड़ रूपया
• कुपोषण मुकती अउ पोषण अभियान बर: 235 करोड़ रूपया

के प्रावधान करे गे हवय, जेहा आने वाला पीढ़ी ला तंदुरुस्त अउ मजबूत बनाय बर एक बड़े निवेश आय।

महिला एवं बाल विकास मंत्री लक्ष्मी राजवाड़े ह किहिन कि राज मा महिला मन के आर्थिक मजबूती बर ‘महतारी वंदन योजना’ एक मील के पत्थर साबित होय हवय। 10 मार्च 2024 ले सुरु ए योजना मा लगभग 70 लाख महिला मन ला हर महीना 1 हजार रूपया के मदद मिलत हवय। अब तक 26 किसत के जरिया ले 16 हजार 881 करोड़ रूपया ले जादा रासी सीधा हितग्राही मन के खाता मा डाले जा चुके हवय। उहें, ए योजना बर 8 हजार 200 करोड़ रूपया के बजट प्रावधान सरकार के अटूट संकल्प ला देखाथे।

उमन बताइन कि बेटी मन के भविसत ला सुरक्षित बनाय बर ‘रानी दुर्गावती योजना’ के परस्ताव रखे गे हवय। ए योजना मा जब बेटी ह 18 बछर के हो जाही, त ओला 1 लाख 50 हजार रूपया के मदद दिय जाही। एखर बर सरकार ह 15 करोड़ रूपया के प्रावधान करे हवय।

राज मा माई लोगन मन बर बुनियादी सुबिता मन के घलो बिस्तार तेजी ले होवत हवय। ‘महतारी सदन’ बनाय बर 75 करोड़ रूपया रखे गे हवय, जेमा ले अब तक 368 सदन मन ला मंजूरी मिल चुके हवय अउ 137 ठन बनके तइयार हो गे हें। संग मा, 500 नवा आंगनबाड़ी केंद्र बनाय बर 42 करोड़ रूपया तय करे गे हवय, जेखर से गाँव अउ सहर मा सरकारी सेवा मन अउ जादा मजबूत होही।

मातृत्व सुरक्षा के छेत्र मा ‘प्रधानमंत्री मातृत्व वंदना योजना’ के तहत 3 लाख 73 हजार ले जादा पंजीयन (रजिस्ट्रेशन) होय हवय अउ 235 करोड़ रूपया ले जादा के रासी मनखे मन ला मिल चुके हवय। बछर 2023-24 मा जहाँ 1 लाख 75 हजार ले जादा पंजीयन होय रहिस, उहें 2024-25 मा ए संख्या बाढ़ के 2 लाख 19 हजार ले ऊपर पहुँच गे। बछर 2025-26 मा फरवरी तक 2 लाख 4 हजार ले जादा पंजीयन हो चुके हवय, जऊन ह तय लक्ष्य के 93 प्रतिशत ले जादा आय।

पोषण अभियान मा घलो राज ह बड़े उपलबधि हासिल करे हवय। ‘पोषण माह 2024’ के बखत हर केंद्र मा प्रदर्शन के मामला मा हमर परदेस ह पहिली नंबर मा रहिस, अउ सब्बो काम-काज ला मिला के पूरा देस मा तीसर नंबर मा रहिस। उहें, ‘न्योता भोज’ जइसन नवा नवा कोसिस मन के तहत 9 हजार 700 ले जादा कार्यक्रम रखे गिस, जेखर ले 1 लाख 83 हजार ले जादा लइका मन ला फायदा मिलिस।

मंत्री लक्ष्मी राजवाड़े ह बताइन कि माई लोगन मन ला आतमनिर्भर बनाय बर स्व-सहायता समूह मन ला ‘रेडी-टू-ईट’ जइसन काम मन ले जोड़े जावत हे, अउ ‘लखपति दीदी’ योजना के जरिया ले उमन ला बेपार के नवा मउका दिय जावत हवय। उज्ज्वला योजना के तहत लगभग 38 लाख महिला मन ला लाभ मिलत हे, जेखर से उमन ला साफ ईंधर (गैस) के सुबिता मिलिस हे। उहें, ‘सखी वन स्टॉप सेंटर’ के संख्या ला 27 ले बढ़ा के 34 कर दिय गे हवय, जहाँ 14 हजार 300 ले जादा मामला मन मा ले 8 हजार 900 ले जादा के निपटारा करे जा चुके हवय।

ए बात साफ़ हवय कि “महतारी गौरव वर्ष” सिरिफ एक नाम के अभियान नोहे, बल्कि एहा ठोस नतीजा देय वाला काम आय। श्री विष्णु देव साय अउ श्रीमती लक्ष्मी राजवाड़े के अगुवाई मा छत्तीसगढ़ के माई लोगन मन अब विकास के मुख्य आधार बनके उभरत हें अउ राज ला नवा दिसा देवत हें।