नक्सलमुक्त बस्तर में विकास के नवा गुंज: मुख्यमंत्री विष्णुदेव साय ह सुकमा ला दीन 308 करोड़ के विकास काम के सौगात
रायपुर . नक्सलवाद के साया ले निकल के नवा भरोसा अउ विकास के डहर में आगू बढ़त बस्तर क्षेत्र में आज एक बड़े उपलब्धि जुड़ गे, जब मुख्यमंत्री विष्णुदेव साय ह सुकमा जिला ला 308 करोड़ रुपिया ले जादा के 228 विकास काम के सौगात दीन। ए दौरान ओमन 159 काम के भुंइया पूजन (शिलान्यास) अउ 69 काम के लोकार्पण करके क्षेत्र के विकास ला नवा रफ़्तार दीन।
सुकमा के मिनी स्टेडियम में होय कार्यक्रम में मुख्यमंत्री श्री साय ह भारी भीड़ ला संबोधित करत कहिन कि—”पिछले 40 बछर ले नक्सलवाद के सेती पिछड़ गे इलाका मन के सबो डहर ले विकास करना राज्य सरकार के पहली प्राथमिकता आय। प्रधानमंत्री नरेंद्र मोदी अउ केंद्रीय गृहमंत्री अमित शाह के मार्गदर्शन में बस्तर में सांति आय हे अउ अब इहां विकास के गंगा बहत हे।”
मुख्यमंत्री श्री साय ह कहिन कि जऊन गांव मन में कभु हिंसा अउ डर के माहौल रहिस, आज ओ जगा स्कूल के घंटी गूंजत हे अउ मनखे मन लोकतंत्र ऊपर भरोसा जतावत मुख्यधारा ले जुड़त हें। ओमन बताइन कि 3 हजार ले जादा माओवादी मन आत्मसमर्पण कर चुके हें अउ ओमन ला पुनर्वास केंद्र मन के माध्यम ले नवा जिंदगी सुरू करे बर ट्रेनिंग देय जात हे।
स्वस्थ बस्तर के डहर में बड़े कदम
कार्यक्रम के बखत मुख्यमंत्री ह खुद घलो अपन स्वास्थ्य जांच कराइन अउ “मुख्यमंत्री स्वस्थ बस्तर अभियान” के तहत स्वास्थ्य सुविधा मन ला घर-घर तक पहुँचाए के कोशिश मन के सराहना करिन। ए अभियान के तहत 7 जिला मन में 1100 टीम मन घर-घर जाके स्वास्थ्य के जांच करहीं।
कार्यक्रम ले पहिली मुख्यमंत्री श्री साय ह मिनी स्टेडियम में लगाय गे अलग-अलग विभाग के स्टॉल मन के मुआयना करिन अउ आम नागरिक अउ हितग्राही मन ले सीधा गोठ-बात करिन। ओमन ओही जगा कतको योजना मन के तहत सहायता सामग्री अउ प्रमाण पत्र बांट के सरकार के संवेदनशीलता ला देखाइन। स्वास्थ्य विभाग के स्टॉल में मुख्यमंत्री ह 7 टीबी मुक्त पंचायत मन ला प्रमाण पत्र दीन अउ जानकारी लीन कि जिला में अब तक 28 पंचायत मन टीबी ले मुक्त हो चुके हें। ओमन 3 टीबी मरीज मन ले गोठियाइन अउ ओमन ला ‘फूड बास्केट’ घलो दीन।
मोतियाबिंद के ऑपरेशन कराय मरीज मन ला मुख्यमंत्री ह अपन हाथ ले चश्मा पहिराइन अउ ओमन के बने स्वास्थ्य के कामना करिन। संग ही दवाई अउ आई ड्रॉप घलो बांटे गिस। स्वास्थ्य सुविधा के गुणवत्ता सुधारे बर मूर्तोंडा, पेंटा अउ कांकेरलंका उपस्वास्थ्य केंद्र मन ला ‘एनक्वास सर्टिफिकेट’ (NQAS) प्रदान करे गिस। समाज कल्याण विभाग के स्टॉल में मुख्यमंत्री श्री साय ह आईईडी ब्लास्ट (IED Blast) में अपन गोड़ गंवा चुके 5 हितग्राही मन ला नकली (कृत्रिम) गोड़ दीन। एकर अलावा 4 व्हीलचेयर अउ 3 ट्राइसिकल घलो बांटे गिस अउ 6 दिव्यांग मन ला पहचान पत्र देके ओमन ला योजना मन ले जोड़े के पहल करे गिस।
एनआरएलएम (NRLM) स्टॉल में स्व-सहायता समूह के महिला मन ले गोठ-बात करत मुख्यमंत्री ह ओमन ला “लखपति दीदी ले करोड़पति दीदी” बने बर उत्साहित करिन अउ सरकार के डहर ले सबो किसम के मदद करे के भरोसा दिलाइन।
आवास, अधिकार अउ आजीविका—हर क्षेत्र में सशक्तिकरण
मुख्यमंत्री ह प्रधानमंत्री आवास योजना के स्टॉल में हितग्राही मन ले गोठ-बात करके मकान बने के काम के रफ़्तार के जानकारी लीन। आदिवासी विकास विभाग के कोति ले 15 वनाधिकार पत्र बांटे गिस, जेकर ले आदिवासी परिवार मन ला ओकर अधिकार के सुरक्षा मिलिस। वन विभाग के स्टॉल में तेंदूपत्ता बिने वाला हितग्राही मन ला सहायता सामग्री प्रदान करे गिस। सहकारी समिति तोंगपाल ला 4.27 लाख रुपिया के सांकेतिक चेक देय गिस अउ एक हितग्राही ला संग्रहण कार्ड बांटे गिस।
एकर संग ही पुनर्वासित स्व-सहायता समूह के महिला मन ला 2 ई-रिक्शा प्रदान करके स्वरोजगार ला बढ़ावा देय गिस अउ एक हितग्राही ला नियुक्ति पत्र (job letter) घलो प्रदान करे गिस।
नियद नेल्लानार 2.0 अउ 8 बड़े घोषणा मन
मुख्यमंत्री ह अपन भासन में बताइन कि ‘नियद नेल्लानार योजना’ के तहत अब तक 500 ले जादा गांव मन में 17 विभाग के 45 योजना मन के माध्यम ले विकास के काम करे गये हे। ए योजना के अगला चरण ‘नियद नेल्लानार 2.0’ में अब 10 जिला मन ला सामिल करे जाही।
ए मौका में मुख्यमंत्री ह क्षेत्र के विकास बर 8 बड़े घोषणा घलो करिन, जेमें सड़क निर्माण, पुलिया निर्माण, बस स्टैंड, सामुदायिक भवन अउ मंदिर मन के जीर्णोद्धार (मरम्मत) के काम सामिल हे।
ए कार्यक्रम में स्वास्थ्य मंत्री श्यामबिहारी जायसवाल, सांसद महेश कश्यप, मुख्य सचिव विकास शील, स्वास्थ्य सचिव अमित कटारिया, मुख्यमंत्री के विशेष सचिव रजत बंसल समेत बड़े अधिकारी, जनप्रतिनिधि अउ भारी संख्या में ग्रामीण मन उपस्थित रहिन।
