माओवाद के बाद विकास के नवा रद्दा: पुसपाल बनही ईको-टूरिज्म हब
रिसॉर्ट अउ ओपन रेस्टोरेंट ले बढ़ही पर्यटन अउ आजीविका के साधन: मंत्री केदार कश्यप
रायपुर. कोण्डागांव जिला के पुसपाल इलाका ले माओवाद खतम होय के बाद अब विकास के नवा तस्वीर दिखत हे। कतको बछर तक प्रभावित रहे के सेती जिहाँ पर्यटन के काम-बुता ठप रहिस, उहें अब केंद्र अउ राज्य सरकार के संजुक्त कोसिस ले इलाका मा सांति आय हे अउ पर्यटन के संभावना फेर ले जागत हें।
एही डहार एक बड़े कदम उठावत वन मंत्री केदार कश्यप ह ग्राम परौदा मा लगभग 1 करोड़ 45 लाख 96 हजार रूपया के लागत ले बनइया ईको-टूरिज्म रिसॉर्ट के भूमिपूजन करिन। संगे-संग पुसपाल इलाका मा ही 1 करोड़ 70 लाख रूपया के लागत ले नदी तीरे मा बनइया ओपन रेस्टोरेंट के घलो भूमिपूजन करे गिस।
वन मंत्री श्री कश्यप ह कहिन कि पुसपाल ला विकसित करे के मकसद कोण्डागांव–बस्तर ईको-टूरिज्म सर्किट ला मजबूत बनाना आय। अभी तक सैलानी टाटामारी अउ चित्रकूट तक ही सीमित रहिन, फेर अब पुसपाल मा नवा सुविधा सुरू होय ले पर्यटन के दायरा घलो बढ़ही। ओमन बताइन कि इहाँ भंवरडीह नदी मा एटीवी राइड, एडवेंचर स्पोर्ट्स, रिवर राफ्टिंग अउ बाँस राफ्टिंग कस खेल-कूद सुरू करे जाही।
एकर संग पुसपाल वैली मा व्यू पॉइंट ले बुड़त सुरुज (सूर्यास्त) के सुंदर नजारा देखे के संग सैलानी मन ईको-कॉटेज मा रात कुन तारा ले भरे अकास के आनंद लेवत सुस्ता सकहीं। ओमन कहिन कि ईको-टूरिज्म के विकास ले स्थानीय मनखे मन ला रोजगार के नवा मउका मिलही, जेकर ले ओकर मन के कमाई बढ़ही अउ इलाका के संस्कृति ला देस-बिदेस मा पहिचान मिलही।
कार्यक्रम के बखत तेंदूपत्ता संग्राहक मन ला संग्रहण कार्ड घलो बाँटे गिस। मंत्री श्री कश्यप ह संग्राहक ले अरजी करिन कि ओमन जादा मात्रा मा अउ बढ़िया कउलिटी के तेंदूपत्ता बटोरें, ताकि ओमन ला बने दाम अउ बोनस के लाभ मिल सके।
आखिरी मा वन विभाग ह जम्मो जनप्रतिनिधि अउ गांव वाले मन ले जंगल ला आगि ले बचाए, ओकर सुरक्षा करे अउ अवैध कब्जा ला रोके मा सहयोग करे के अपील करिन।
ए मउका मा जिला पंचायत सदस्य यशोदा कश्यप सहित अउ दूसर जनप्रतिनिधि, प्रशासनिक अधिकारी अउ बड़े संख्या मा स्थानीय ग्रामीण मन मौजूद रहिन।
