छत्तीसगढ़ के बेटी शिवानी सोनी ह रचिस इतिहास
अंतर्राष्ट्रीय गोल्फ खिलाड़ी ‘इंटरनेशनल बुक ऑफ रिकॉर्ड्स’ ले सम्मानित
प्रदेश के प्रतिभा के बढ़िस दुनिया भर मा मान मंत्री राजेश अग्रवाल ह भेंट करके दीन बधाई
रायपुर. अम्बिकापुर के होनहार गोल्फ खिलाड़ी शिवानी सोनी ह अंतर्राष्ट्रीय स्तर मा छत्तीसगढ़ के नाव रोशन करत हुए एक नवा कीर्तिमान स्थापित करे हे। सबले जादा अंतर्राष्ट्रीय टूर्नामेंट्स मा भारत के प्रतिनिधित्व करइया छत्तीसगढ़ के पहिली महिला खिलाड़ी के रूप मा शिवानी ला ‘इंटरनेशनल बुक ऑफ रिकॉर्ड्स’ डहर ले सम्मानित करे गे हे। ए ऐतिहासिक उपलब्धि मा प्रदेश के पर्यटन अउ संस्कृति मंत्री राजेश अग्रवाल ह ओखर ले भेंट करिन अउ ओला बधाई देवत हुए आगू के जिनगी बर सुभकामना दीन।
मंत्री श्री अग्रवाल ह कहिन कि जब बेटी मन अपन मेहनत अउ प्रतिभा ले सफलता के नवा रद्दा बनाथें, त पूरा समाज गौरवान्वित महसूस करथे। शिवानी सोनी के ए उपलब्धि न केवल युवा मन, खास करके बेटी मन बर प्रेरणा के स्रोत हे, बल्कि ए ह छत्तीसगढ़ के खेल प्रतिभा के दुनिया के मंच मा एक बड़े परमान घलो हे। ओमन कहिन कि राज्य सरकार खेल प्रतिभा ला आगू बढ़ाय बर लगातार कोसिस करत हे अउ अइसने खिलाड़ी ला हर संभव मदद दे जाही।
ए मउका मा शिवानी सोनी ह घलो मंत्री श्री अग्रवाल के आभार मानिस अउ कहिस कि ओला प्रदेश अउ देस के प्रतिनिधित्व करे के मौका मिलना बड़ गर्व के बात हे। ओ ह आगू घलो बने प्रदर्शन करके देस के नाव रोशन करे बर पूरा मेहनत करही।
शिवानी के ए उपलब्धि ले अम्बिकापुर संगे-संग पूरा प्रदेश मा खुसी अउ गरब के माहौल हे। ए सफलता ह आघू के पीढ़ी ला खेल के क्षेत्र मा आगू बढ़े बर उत्साहित करही।
