वन मंत्री केदार कश्यप ह दहिकोंगा तेंदूपत्ता फड़ के करिन निरीक्षण

वन मंत्री ह संग्राहक मन ले करिन सीधा गोठ-बात

रायपुर. वन अउ जलवायु परिवर्तन मंत्री केदार कश्यप ह आज इतवार के दिन कोण्डागाँव जिला के दहिकोंगा मा तेंदूपत्ता फड़ के अचानक निरीक्षण करिन। ए बखत ओमन तेंदूपत्ता के गुन (quality) ला देखिन अउ संग्राहक ला होवइया ऑनलाइन भुगतान के व्यवस्था के जानकारी लीन।

निरीक्षण के बेरा मा मंत्री श्री कश्यप ह दू झन संग्राहक के मोबाइल मा खुद ऑनलाइन एंट्री करके भुगतान के प्रक्रिया ला पूरा कराइन। ओमन कहिन कि राज्य सरकार तेंदूपत्ता संग्राहक मन ला साफ-सुथरा अउ बखत मा पइसा मिले बर डिजिटल व्यवस्था ला बढ़ावा देवत हे।

वन मंत्री ह संग्राहक ले सीधा गोठ-बात करके ओमन ला “तेंदूपत्ता तिहार” के बधाई अउ सुभकामना दीन, संगे-संग सरकार के योजना के जादा ले जादा लाभ उठाय बर ओमन ला उत्साहित करिन। ओमन कहिन कि तेंदूपत्ता बिनइया श्रमिक के आय बढ़ाय अउ ओमन के सुविधा मा सुधार करे बर राज्य सरकार लगातार प्रयास करत हे।

ए मउका मा कोण्डागाँव के वन मंडलाधिकारी चूड़ामणि सिंह, संयुक्त वन मंडलाधिकारी डॉ. आशीष कोटरिवार, परिक्षेत्र अधिकारी कोण्डागाँव, परिक्षेत्र अधिकारी दहिकोंगा अउ आन अधिकारी-करमचारी मन उपस्थित रहिन।