प्रकृति, सांति अउ तिब्बती संस्कृति के अनूठा संगम- मैनपाट
छत्तीसगढ़ के सबले ठंडा अउ सुंदर वादी में छुट्टी बिताए के बढ़िया ठउर (Destination)
रायपुर . छत्तीसगढ़ के मैनपाट ह अपन प्राकृतिक सुंदरता, सुग्घर मौसम अउ सांस्कृतिक विविधता बर दुनिया भर में जान जाथे। अगर आप मन ए गरमी के दिन में सकून अउ ठंढक खोजत हव, त मैनपाट आप मन बर सबले बढ़िया जगह आय।
छत्तीसगढ़ के शिमला अउ मिनी तिब्बत राज्य के उत्तर डाहर बसे ए पहाड़ी पर्यटन स्थल ल “छत्तीसगढ़ के शिमला” अउ “मिनी तिब्बत” कहे जाथे। समुद्र तल ले लगभग 3500 फीट के ऊँचाई में बसे ए पठार ह अपन ठंडा जलवायु, घना जंगल, सुग्घर झरना अउ तिब्बती संस्कृति बर मनखे मन के बीच बहुत लोकप्रिय हे।
देखे लायक जगह अउ रोमांच मैनपाट के प्रमुख आकर्षण में:
- टाइगर पॉइंट अउ फिश पॉइंट: ए मन बड़ सुंदर जलप्रपात (झरना) अउ पिकनिक मनाए के जगह हें।
- जलजली: ए ह एक अचरज भरे दलदली जमीन आय, जहाँ गोड़ पटक ले धरती ह उछलत कस महसूस होथे।
- उल्टा पानी: इहाँ पानी ह गुरुत्वाकर्षण के उल्टा ऊपर कोती बहत दिखथे।
- परपाटिया व्यू पॉइंट: इहाँ ले पहाड़ मन के बहुत सुंदर नजारा देख जा सकथे।
सांस्कृतिक पहिचान- तिब्बती बस्ती साल 1962 में इहाँ तिब्बती ल बसाए गे रिहिस, जेकर बाद ले ए क्षेत्र ह बौद्ध धर्म अउ तिब्बती हस्तशिल्प के केंद्र बन गे। इहाँ के बौद्ध मठ, रंग-बिरंगे झंडा अउ तिब्बती खाना जइसन कि मोमोज अउ थुकपा मनखे मन ल एक अलग दुनिया के अहसास कराथें।
पर्यटन बर सरकार के कोसिस छत्तीसगढ़ सरकार ह मैनपाट ल अंतर्राष्ट्रीय स्तर के पर्यटन केंद्र बनाए बर काम करत हे। इहाँ हर साल होय वाला “मैनपाट कार्निवल” ह एकर रौनक ल अउ बढ़ा देथे। अब हवाई सुविधा शुरू होय ले इहाँ आने वाला मनखे मन के संख्या अउ बढ़ही।
कइसने पहुँचब?
- सड़क मार्ग: रायपुर ले मैनपाट लगभग 350 किलोमीटर दूरिहा हे। रायपुर ले अंबिकापुर तक बस या ट्रेन ले जा सकथौ, जहाँ ले मैनपाट खाली 55 किलोमीटर हे।
- हवाई सुविधा: अंबिकापुर के माँ महामाया एयरपोर्ट (दरिमा) ले दिल्ली अउ कोलकाता बर उड़ान शुरू हो चुके हे, जेकर ले मनखे मन के समय बचही।
रुकना अउ सुविधा पर्यटक बर छत्तीसगढ़ पर्यटन मंडल कोती ले सैला टूरिस्ट रिसॉर्ट अउ कर्मा एथनिक रिसॉर्ट चलाए जाथे। इहाँ पारंपरिक रहन-सहन अउ आधुनिक सुविधा दूनों मिलथे। आप मन पर्यटन मंडल के वेबसाइट ले ऑनलाइन बुकिंग घलो कर सकथौ।
