सुशासन तिहार में समाधान सिबिर ले आम मनखे ला मिलत हे लाभ
बलौदा बाज़ार में ‘सुशासन सेल्फी’ बनिस खेंचई के केंद्र
रायपुर, राज सासन के निर्देस के मुताबिक जन-सिकायत के समय में अउ सुग्घर निपटारा करे बर अउ आम मनखे ला सुलभ, पारदरसी अउ तुरते सेवा मिले, एखर बर सुशासन तिहार 2026 के तहत बलौदा बाज़ार जिला के गाँव अउ सहर में जनसमस्या निवारण सिबिर लगाए जावत हे। ए कड़ी में भाटापारा के ग्राम मोपर, पलारी के ग्राम ससहा, कसडोल के ग्राम डेराडीह अउ नगर पंचायत पलारी में जनसमस्या निवारण समाधान सिबिर के आयोजन करे गिस।
सिबिर में इहाँ के जनप्रतिनिधि मन ह हितग्राही ला अलग-अलग योजना के तहत समान, चेक अउ सम्मान पत्र दीन। एमा खाद्य विभाग कोती ले राशन कार्ड, स्वास्थ्य विभाग कोती ले आयुष्मान कार्ड अउ चस्मा, पंचायत एवं ग्रामीण विकास विभाग कोती ले मनरेगा जॉब कार्ड, पीएम आवास योजना के चाबी, मछली पालन विभाग कोती ले 2 ठन महाजाल अउ आइस बॉक्स, उद्यानिकी विभाग कोती ले फल वाला पौधा, समाज कल्याण विभाग कोती ले भारत माता वाहिनी ला सीटी अउ छड़ी, टीबी मुक्त गाँव के सरपंच ला महात्मा गांधी के मूरती, अउ खेल एवं युवा कल्याण विभाग कोती ले लइका ला स्पोर्ट्स किट देय गिस।
समाधान सिबिर के जरिए उही मेर फाइल तइयार होवत हे अउ उही मेर तुरते निपटारा घलो करे जावत हे। एमा नामांतरण, बँटवारा अउ सीमांकन जइसन राजस्व मामला के संग-संग मनरेगा के रुके हुए मजूरी, आय-जाति-निवास परमान पत्र, बिजली, ट्रांसफार्मर अउ पानी, आधार कार्ड, राशनकार्ड, आयुष्मान कार्ड, महतारी वंदन, पेंशन, अउ श्रम कार्ड जइसन अलग-अलग विभाग के योजना ले लाभ देय ला बिसेस रूप ले सामिल करे गे हे।
ए सिबिर मन में सिरिफ अरजी लेय तक सीमित नई रहय जाय, बल्कि हकदार हितग्राही ला योजना के लाभ उही मेर दिय जाही अउ हर अरजी के जादा ले जादा एक महीना के भीतर निराकरण करना तय करे गे हे। सिबिर में जिला के अधिकारी मन ह अपन-अपन विभाग के जानकारी देवत योजना के बारे में बताइन अउ लाभ लेय बर लोगन ला उत्साहित करिन।
सुशासन सेल्फी बनिस खेंचई के केंद्र – समाधान सिबिर में सुग्घर ‘सुशासन सेल्फी’ स्टैण्ड बनाए गे रहिस। सिबिर में आय ग्रामीण एमा सेल्फी लेय बर उताउल नजर आइन। एकर संग ही महिला एवं बाल विकास विभाग कोती ले लइका वाले महतारी ला सुपोषण किट देय गिस अउ स्वास्थ्य विभाग कोती ले हेल्थ कैंप घलो लगाए गे रहिस। तेज घाम ला देखत ए कैंप में ओआरएस (ORS) घोल के घलो सुबिधा रखे गे रहिस।
