‘मुख्यमंत्री विष्णुदेव साय के बड़े सौगात’: जशपुर में श्री नदी ऊपर बनही उच्च स्तरीय पुल, तीन राज के मेल-जोल होही मजबूत
9 करोड़ 45 लाख के लागत ले बनही श्री नदी ऊपर पुल; झारखंड अउ ओडिशा जाय-आय हो जाही असान
रायपुर. मुख्यमंत्री विष्णुदेव साय के अगुवई में जशपुर जिला ला एक अउ बड़े विकास काम के सौगात मिले हे। राज सरकार कोती ले साल 2025-26 के बजट में कुनकुरी-तपकरा-लवाकेरा रद्दा में श्री नदी ऊपर उच्च स्तरीय पुल अउ पहुँच मार्ग (सड़क) बनाए बर 9 करोड़ 45 लाख 85 हजार रूपिया के मंजूरी दिय गे हे।
ए रद्दा ह छत्तीसगढ़, झारखंड अउ ओडिशा ला जोड़े वाला एक बहुत जरूरी रस्ता आय। बड़े पुल बन जाय ले ए तीनों राज मन के बीच आवन-जावन ह अउ जादा सुरक्षित, सुग्घर अउ बिना कोनो रुकावट के हो सकही। संग ही व्यापार, गाड़ी-घोड़ा के चलन, पढ़ाई, दवाई अउ रोजगार के काम ला घलो नवा तेजी मिलही।
अभी के बखत में ए रद्दा में बने सकरा पुल ह बरसात के दिन में भारी मुसीबत बन जावत रहिस। पानी बाढ़े ले आवन-जावन रुक जावत रहिस अउ गाँव वाले मन ला जान जोखिम में डाल के नदी पार करे बर परत रहिस। कतको दिन ले इहाँ के मनखे मन बड़े पुल बनाए के माँग करत रहिन। अब मंजूरी मिले के बाद पूरा इलाका में खुसी के माहौल हे।
गाँव वाले मन मुख्यमंत्री विष्णुदेव साय ला धनबाद देवत कहिन कि— “राज सरकार ह सीमावर्ती अउ गाँव के इलाका में विकास ला प्राथमिकता देवत लगातार जनहित के काम करत हे। पुल बने ले हजारों मनखे मन ला सुरक्षित आवन-जावन के सुबिधा मिलही अउ इलाका के विकास ला नवा दिसा मिलही।”
इहाँ के मनखे मन के मानना हे कि श्री नदी ऊपर बनइया ए उच्च स्तरीय पुल ह जशपुर जिला बर विकास के नवा दुआर साबित होही अउ परदेस के दुरिहा अंचल ला सुग्घर संपर्क सुबिधा ले जोड़े में बड़े भूमिका निभाही।
