मुख्यमंत्री बिजली बिल भुगतान समाधान योजना: लाखों उपभोक्ता ला राहत देवइया जनहितैषी पहल
रायपुर. मुख्यमंत्री विष्णुदेव साय के अगुवई में राज सरकार ह आम जनता ला राहत पहुँचाए अउ सुशासन ला मजबूत करे कोती लगातार काम करत हे। एही कड़ी में बिजली उपभोक्ता ला बड़े राहत देय के मतलब ले “मुख्यमंत्री बिजली बिल भुगतान समाधान योजना-2026” लागू करे गे हे। ए योजना ह घरेलू, बीपीएल अउ खेती-किसानी (कृषि) उपभोक्ता मन ला बकाया बिजली बिल पटाए में मदद के संग-संग असान रस्ता घलो देखावत हे।
योजना के तहत उपभोक्ता ला बकाया बिजली बिल के भुगतान एकमुश्त (एक साथ) या फेर असान किस्त मन में करे के सुबिधा दिय गे हे। सबले बिसेस बात ए हे कि 31 मार्च 2023 तक के जतका घलो बकाया बिजली बिल हे, ओमा 100 प्रतिशत सरचार्ज (ब्याज) माफी के फायदा दिय जावत हे, जेखर ले लाखों परिवार ला आर्थिक राहत मिलत हे।
राज सरकार के लक्ष्य हे कि कोनो घलो उपभोक्ता ह रूपिया-पइसा के कमी के सेती बिजली के सुबिधा ले वंचित झन रहय। एही सोच के संग योजना ला सरल अउ सुलभ बनाए गे हे। योजना के लाभ लेय बर उपभोक्ता के पंजीयन (रजिस्ट्रेशन) ला जरूरी रखे गे हे।
उपभोक्ता मन के सुबिधा बर पंजीयन के बेवस्था अलग-अलग माध्यम ले करे गे हे। उपभोक्ता मन “मोर बिजली” एप, CSPDCL के आधिकारिक वेबसाइट, तीर-तखार के बिजली दफ्तर अउ बिसेस पंजीयन सिबिर के जरिया असानी ले अपन पंजीयन करा सकथें। ए योजना ह 12 मार्च 2026 ले लागू हे अउ फायदा लेय के आखिरी तारीख 30 जून 2026 तय करे गे हे।
अभी तक लाखों उपभोक्ता ए योजना ले जुड़ चुके हें अउ कतको मामला के निपटारा करके उपभोक्ता ला करोड़ों रूपिया के राहत दिय जा चुके हे। आँकड़ा के बात करबो त अभी तक परदेस के 07 लाख 24 हजार उपभोक्ता मन ह पंजीयन कराए हें। 1 लाख 63 हजार मामला के निपटारा करके कुल 06 करोड़ 22 लाख रूपिया ले जादा के राहत पहुँचाए जा चुके हे।
मुख्यमंत्री विष्णुदेव साय ह कहिन कि— “राज सरकार ह जनता के समस्या के समाधान बर संकलप ले हे अउ आम मनखे ला राहत पहुँचावइया योजना ला प्राथमिकता ले लागू करे जावत हे। ‘मुख्यमंत्री बिजली बिल भुगतान समाधान योजना 2026’ एही जनहितकारी सोच के फल आय, जे ह लाखों उपभोक्ता के जिनगी में राहत अउ बिस्वास लेके आईस हे।”
