चलत विकास काम ला समे म पूरा करव, जे काम सुरू नइ होय हे ओला तुरंते सुरू कराव: उद्योग मंत्री

काम मं देरी अउ बीच मं काम रोके ले निर्माण एजेंसी ऊपर होही कार्यवाही, गुणवत्ता मं कोनो समझौता नइ करे जाय

रायपुर. प्रदेश के उद्योग, सार्वजनिक उपक्रम, आबकारी अउ श्रम मंत्री लखनलाल देवांगन ह कल नगर निगम कोरबा के अधिकारी ला कड़ा निर्देश देवत कहिन कि निगम क्षेत्र के वार्ड मं जे विकास काम चलत हे, ओला समे मं पूरा कराव अउ जे काम अभी तक सुरू नइ होय हे, ओला तुरंते सुरू कराव। ओमन कहिन कि काम सुरू करे मं देरी करइया अउ काम ला बीच मं रोकइया एजेंसी ऊपर कार्यवाही करव, ओमन ला नोटिस देव अउ अगर फेर घलो काम सुरू नइ करंय, त ओमन के अमानत राशि ला राजसात करके ओला ब्लैक लिस्ट करे के कार्यवाही करव। ओमन ए बात ला तय करे बर कहिन कि विकास काम ह पूरी तरह ले गुणवत्ता वाले होवय अउ गुणवत्ता के संग कोनो भी समझौता झन होवय।

उद्योग मंत्री लखनलाल देवांगन ह ए निर्देश विकास काम के समीक्षा बैठक मं अधिकारी ला दीन। मंत्री श्री देवांगन ह नगर पालिक निगम कोरबा के दर्री जोन अउ सर्वमंगलानगर जोन के अधिकारी अउ वार्ड पार्षद के बैठक लेके ए दूनों जोन के 20 वार्ड के काम के समीक्षा करिन। बैठक मं महापौर संजूदेवी राजपूत, आयुक्त आशुतोष पाण्डेय, सभापति नूतन सिंह ठाकुर अउ वरिष्ठ पार्षद नरेन्द्र देवांगन घलो उपस्थित रहिन।

अभी दर्री जोन अउ सर्वमंगलानगर जोन मं कुल 166 काम स्वीकृत होय रहिस, जेमं दर्री जोन के 14 वार्ड मन के 112 काम मं ले 45 काम पूरा हो गे हे, 45 काम चलत हे अउ 22 काम अभी सुरू नइ होय हे। ओसने सर्वमंगला नगर जोन के 6 वार्ड के 54 काम मं ले 28 काम पूरा, 14 चलत अउ 12 काम अभी सुरू नइ होय हे।

जे काम सुरू नइ होय हे, ओकर वार्डवार समीक्षा करत हुए उद्योग मंत्री ह अधिकारी ला कड़ा निर्देश दीन कि एजेंसी ला नोटिस देके काम जल्दी सुरू कराव। समीक्षा मं ए बात घलो अइस कि कुछ काम बीच मं रुके हे, जेखर ऊपर मंत्री ह कड़ा रुख अपनावत कहिन कि एजेंसी ला काम सुरू करे के नोटिस देव, फेर घलो काम सुरू नइ करहीं त ओमन के पैसा ला राजसात करके ओला ब्लैक लिस्टेड करव। उद्योग मंत्री ह अधिकारी ले कहिन कि काम के बखत इंजीनियर लगातार देखरेख (मानीटरिंग) करंय, गुणवत्ता मं खास धियान रखंय अउ ए बात ला तय करंय कि काम मं उपयोग होय वाली सामग्री ह तय मानक के मुताबिक होवय।

अलग-अलग निर्माण काम मन के वार्डवार समीक्षा

बैठक के बखत उद्योग मंत्री श्री देवांगन ह दर्री जोन अउ सर्वमंगला नगर जोन के वार्ड मं अलग-अलग मद—जिला खनिज न्यास मद (DMF), अधोसंरचना, वित्त आयोग मद, मध्यक्षेत्र आदिवासी विकास प्राधिकरण, राजस्व अउ आपदा प्रबंधन, प्रभारी मंत्री मद, विधायक मद, सी.एस.आर. मद, महापौर मद, पार्षद निधि, निगम मद संग आन मद के तहत होय वाला सी.सी. रोड निर्माण, नाली निर्माण, सामुदायिक भवन, सार्वजनिक शेड मंच, स्कूल भवन, आंगनबाड़ी, किचन शेड, अहाता अउ बाउण्ड्रीवाल, शौचालय निर्माण, उप स्वास्थ्य केन्द्र के सुधार, अऊ कतको कमरा मन के निर्माण, चबूतरा, सांस्कृतिक मंच निर्माण, कलवर्ट (पुलिया), मुक्तिधाम, घाट पचरी निर्माण, तालाब गहरीकरण, कांजी हाउस के मरम्मत, यात्री प्रतीक्षालय, पानी के सुभीता ले जुड़े काम अउ बिजली विस्तार संग स्ट्रीट लाईट के काम मन के वार्डवार समीक्षा करिन अउ काम मं तेजी लाय के निर्देश दीन।

साफ-सफाई के काम मं अउ जादा कसावट लाओ

उद्योग मंत्री लखनलाल देवांगन ह बैठक मं दूनों जोन के 20 वार्ड मन के साफ-सफाई के व्यवस्था अउ होवत काम के समीक्षा करिन अउ स्वास्थ्य अधिकारी ला निर्देश दीन कि सफाई के काम मं अउ जादा कसावट लाय जाय। ओमन कहिन कि पिछला बछर के स्वच्छ सर्वेक्षण मं हमर कोरबा ह स्वच्छता रैंकिंग मं देस मं 8वां नंबर पाइस रहिस, हम सब ला मिलके ए डाहर मं अउ मिहनत करे ला पड़ही ताकि हमर कोरबा देस मं नंबर-1 मं आवय अउ छत्तीसगढ़ राज संग ऊर्जानगरी कोरबा के मान बढ़य।

पीये के पानी के सप्लाई अउ स्ट्रीट लाईट के काम के समीक्षा

बैठक मं उद्योग मंत्री श्री देवांगन ह पीये के पानी के सप्लाई अउ स्ट्रीट लाईट ले जुड़े काम के समीक्षा करिन। ओमन अधिकारी ला निर्देश देवत कहिन कि सबो वार्ड अउ बस्ती मं पानी के सप्लाई बिना कोनो रुकावट के अउ सही समय मं करे जाय। अगर बिजली गोल होय ले, पाईप लाईन फूटे ले या कोनो आन कारन ले पानी के सप्लाई रुकथे, त तुरंते टैंकर के माध्यम ले पानी पहुँचाव ताकि ए बढ़त गरमी मं मनखे मन ला पानी बर परेशान झन होय ला पड़य। उद्योग मंत्री ह निगम डाहर ले लगाए जावत नवा स्ट्रीट लाईट के काम मं तेजी लाय अउ सबो वार्ड मं एक संग काम करे के निर्देश घलो अधिकारी मन ला दीन।

पार्षद मन जरूरी अउ आवश्यक काम के प्रस्ताव मोला देव

समीक्षा बैठक के बखत उपस्थित वार्ड पार्षद मन ले उद्योग मंत्री श्री देवांगन ह कहिन कि वार्ड मं जे काम कराना बहुत जरूरी हे, ओ काम के सूची ओमन मोला देवंय, ताकि ए जरूरी काम के प्राक्कलन (Estimate) तैयार कराके सरकार ले मंजूरी लेय के कार्यवाही करे जा सकय अउ वार्ड के मनखे मन के मंशा अउ ओमन के जरूरत के मुताबिक वार्ड मं विकास काम कराए जा सकय।

समीक्षा बैठक मं दिये निर्देश मन के कड़ाई ले पालन करव

ए मौका मं महापौर संजूदेवी राजपूत ह निगम के अधिकारी ला निर्देश देवत कहिन कि समीक्षा बैठक के बखत जे भी निर्देश दिये जावत हे, ओकर कड़ाई ले पालन करना तय करव। ओमन कहिन कि निगम के विकास अउ निर्माण काम, नागरिक सुभीता ले जुड़े काम के तेजी के संग-संग आम जनता के समस्या अउ सिकयत ऊपर खास रूप ले धियान देव अउ मिले सिकयत मन के समे मं निराकरण कराव।

बैठक के बखत अपर आयुक्त विनय मिश्रा, अधीक्षण अभियंता सुरेश बरूआ, वार्ड पार्षद मुकुंद सिंह कंवर, अजय कुमार चन्द्रा, विनम्र तिवारी, किशन लाल केंवट, जनकसिंह राजपूत, अयोध्याबाई कंवर, सम्मत कुंवर, राधा महंत, फिरतराम साहू, कल्याणीबाई यादव, प्रीति दिनेश शर्मा, सुखविंदर कौर, आरती सिंह, प्रेमकुमार साहू, रामाधार पटेल, बहत्तर सिंह कंवर, कार्यपालन अभियंता राकेश मसीह, दर्री जोन कमिश्नर लीलाधर पटेल, सर्वमंगला नगर जोन कमिश्नर सुनील टांडे, स्वास्थ्य अधिकारी डॉ. संजय तिवारी, निगम सचिव रामेश्वर सिंह कंवर, सहायक राजस्व अधिकारी सचिन तिवारी, सहायक अभियंता राहुल मिश्रा, यशवंत जोगी, सुशीलचन्द्र सोनी, रितेश सिंह, प्रमोद जगत, शैलेन्द्र नामदेव, उत्तमदास महंत, महेश्वर सिंह संग आन अधिकारी-करमचारी उपस्थित रहिन।