जनता के सेवा हे हमर करम , सुसासन तिहार ह जनबिसवास के माध्यम: मुख्यमंत्री विष्णु देव साय
- लेमरू पहुंचिन मुख्यमंत्री, चौपाल लगाके सुनिन गांव वाले मन के दुख-पीरा
- दूर-दराज के इलाका बर बिकास काम के घोषणा, होनहार लइका मन ला दीन टैबलेट
रायपुर, सुसासन तिहार के तहत आज कोरबा बिकासखंड के दूरस्थ ग्राम लेमरू म लगे जनसमस्या निवारण सिविर (शिविर) म मुख्यमंत्री विष्णु देव साय ह सामिल होइन।
मुख्यमंत्री श्री साय ह कहिन कि जनता के असीस ले सरकार बने हे अउ ओमन के सेवा करना हे सरकार के सबले बड़े धरम अउ करम हे। ओमन कहिन कि सुसासन तिहार ह सरकार के जनता तक सीधा पहुंच अउ मयारुक काम-काज के चिनहा हे।
मुख्यमंत्री श्री साय ह बताइन कि 1 मई ले सुरू होय सुसासन तिहार ह 10 जून तक चलही, जकर दुआर ले पूरा प्रदेश म आम मनखे मन के तकलीफ ला तुरते दूर करे जावत हे। ओमन कहिन कि जिस किसम ले परिवार के मुखिया ह परिवार के सुख-दुख अउ जरूरत के धियान रखथे, ओही भाव ले सरकार घलो गांव-गांव पहुंच के योजना के काम-काज ला देखत हे अउ लोगन के दुख-पीरा सुनत हे। ओमन कहिन कि वे खुद घलो अचानक गांव म पहुंच के रुख के छांव तरी चौपाल लगाके आम जनता ले गोठ-बात करत हें।
मुख्यमंत्री श्री साय ह कहिन कि प्रदेश म माई लोगन, किसान मन, भुइंया-मजूर , बनबासी मन अउ गरीब परिवार बर अब्बड़ अकन जनकलियानकारी योजना चलाए जावत हें। ‘महतारी वंदन योजना’ के तहत 70 लाख माई लोगन मन ला हर महिना पइसा दिये जावत हे। प्रदेश म 18 लाख प्रधानमंत्री आवास के मंजूरी दिये गे हे, जकर म अब्बड़ अकन घर ह बनके तइयार घलो हो गे हे। ओमन कहिन कि तेंदूपत्ता तिहाई ला बढ़ाके 5500 रुपिया प्रति मानक बोरा करे गे हे अउ किसान मन ले बढ़िया दाम म धान खरीदे जावत हे।
उदयोगमंत्री लखनलाल देवांगन ह कहिन कि मुख्यमंत्री विष्णु देव साय के अगुवाई म सरकार ह “मोदी के गारंटी” के जादा तर बादा ला कम समे म पूरा करे हे। गांव-गांव तक योजना के लाभ पहुंचाके गरीब, किसान अउ गरजू ला राहत दिये जावत हे। ओमन कहिन कि सुसासन तिहार के माध्यम ले मुख्यमंत्री स्वयं प्रदेश के दूर-दराज इलाका म पहुंच के जनता ले सीधा गोठ-बात करत हें।
बित्त मंत्री ओ.पी. चौधरी ह कहिन कि एतका कड़ा घाम के बाद घलो मुख्यमंत्री विष्णु देव साय ह लगातार प्रदेश के दूर-दराज इलाका के दौरा करत हें। सुसासन तिहार के दुआर ले तकलीफ ला तुरते दूर करे के संग सरगुजा ले बस्तर तक बिकास के नवा कहानी लिखे जावत हे। ओमन कहिन कि एतका अब्बड़ संख्या म लोगन के मुख्यमंत्री ला सुने अउ ओमन ले मिले बर पहुंचना ह जनता के बिसवास अउ मया के चिनहा हे।
सिविर के बीच म मुख्यमंत्री श्री साय ह लेमरू क्षेत्र बर अब्बड़ अकन बिकास काम के घोसन करिन। ओमन सिंचाई बर एनीकट बनाय, पोस्ट मैट्रिक हॉस्टल खोले, अलग-अलग ग्राम पंचायत मन म बिजली पहुंचाय, स्कूल भवन, आंगनबाड़ी भवन, सीसी रोड अउ पुलिया बनाय के घोसन करिन।
मुख्यमंत्री ह कक्षा 12वीं बोर्ड परीक्षा म 90 प्रतिशत ले जादा नंबर लइया कोरबा जिला के 18 होनहार लइका मन ला टैबलेट प्रदान करके ओमन के सनमान करिन अउ ओमन के आघू के जिनगी बर सुभकामना दीन।
सिविर म मुख्यमंत्री ह अलग-अलग बिभाग के योजना के हितग्राही ला राशन कार्ड, खेती-किसानी के सामान, ट्राइसाइकिल , कान के मशीन (श्रवण यंत्र), मछरी पालन के सामान, पंप, पावर स्प्रेयर, सुपोषण टोकरी अउ स्व-सहायता समूह ला उछाह बढ़ाए बर चेक वितरित करिन। ओमन पीएम आवास योजना के हितग्राही ले घलो मुलाकात करके योजना के काम-काज के जानकारी लीन।
ये मोका म प्रमुख सचिव सुबोध सिंह, विशेष सचिव रजत बंसल के संग दूसर जनप्रतिनिधि अउ अधिकारी उपस्थित रीहिन।
