झापरा सुसासन सिबिर में मौका ऊपर ही बांटे गिस 35 ठन परमान पत्र

गांव वाले ला मिलिस बड़े राहत, किसान के होइस एग्रीस्टैक पंजीयन

रायपुर, कलेक्टर अमित कुमार के अगवाई में सुकमा जिला में ‘सुसासन तिहार’ के तहत ग्राम पंचायत झापरा में सुसासन सिबिर के आयोजन करे गिस। ए सिबिर में अब्बड़ अकन गांव के लोगन मन पहुंचे रहिन अउ सरकार के अलग-अलग योजना अउ प्रशासनिक सेवा मन के लाभ उठाइन।

सिबिर में जिला प्रसासन के अधिकारी ह गांव वाले से सोझ गोठ-बात करके ओमन के दुख-तकलीफ ला सुनिन अउ कतको मामला मन के उही जघा निरकरण करिन। संग च, लोगन मन ला सरकारी योजना , आबेदन करे के तरीका अउ जरूरी कागज-पतर के जानकारी घलो दिइन।

सुकमा तहसीलदार गिरीश निम्बालकर, सरपंच मुन्नी मड़कामी अउ उपसरपंच प्रवीण बारसे के मौजूदगी में पातर (पात्र) हितग्राही ला अलग-अलग परमान पत्र बांटे गिस। सिबिर में 8 ठन जाति परमान पत्र, 12 ठन निवास परमान पत्र, 8 ठन किसान किताब (ऋण पुस्तिका) अउ 2 ठन नामांतरण आदेस दिय गिस। एकर से गांव के लोगन, पढ़इया लइका मन अउ किसान मन ला बड़े राहत मिलिस।

ए सिबिर के एक ठन बड़े उपलपधि किसान मन ला डिजिटल सेवा से जोड़ना घलो रहाय। उहां 5 ठन किसान मन के एग्रीस्टैक पंजीयन करे गिस। एकर से किसान मन ला आहु क समे में डिजिटल खेती-किसानी के सेवा अउ कतको सरकारी योजना मन के लाभ सहलियत से मिल सकही।

गांव के लोगन मन ह सिबिर में तुरंते काम होय अउ एक ही जघा में कतको किसम के सेवा मिले ऊपर अब्बड़ खुसी जताइन। ओमन कहिन कि अइसन सिबिर से गांव में ही जरूरी काम पूरे होवत हें, जेकर से समे अउ पइसा दुनों के बचत होवत हे।

सुसासन तिहार के तहत लगाय जावइया ए सिबिर ह सरकार के योजना के लाभ आखिरी मानुस तक पहुंचाय अउ गांव वाले मन के समसिया के तुरंते निरकरण पक्का करे के दिसा में एक सुघर अउ असरदार कदम साबित होवत हे।