चिरायु योजना ले मिलिस नवा जिंदगी: समीरा अऊ नितिन ह मुख्यमंत्री ला थैंक यू कार्ड देके जताइन आभार
- सुघर राज तिहार म मयारुक पल: मुख्यमंत्री ले मिलके लइका अऊ दाई-ददा मन के आंखी म छलकिस खुसी
- गरीब परवार मन बर बरदान बनिस चिरायु योजना: मुफ्त इलाज ले लइका मन ला मिलिस नवा जीवन
रायपुर . सुघर राज तिहार के बेरा म आज बलौदाबाजार-भाटापारा जिला के ग्राम करहीबाजार म एक ठो मयारुक अऊ प्रेरणा देवाय वाला नजारा देखे बर मिलिस, जब चिरायु योजना के लाभ पाय वाला लइका समीरा जांगड़े अऊ नितिन पटेल ह मुख्यमंत्री विष्णु देव साय ले गजब मया के संग मिलिन अऊ ओमन ला थैंक यू कार्ड भेंट करिन। लइका अऊ ओमन के परवार के मनखे मन ह मुफ्त इलाज बर मुख्यमंत्री साय के आभार जतावत कहिन के ए योजना ह ओमन के परवार ला नवा आस अऊ लइका मन ला नवा जिंदगी दीस हे।
मुख्यमंत्री विष्णु देव साय ह दोनों लइका मन ले मया के संग गोठ-बात करिन, ओमन के सुवास्थ्य के हाल-चाल जानिन अऊ आघू के उज्जर भबिस बर असीस दीस। ओमन कहिन के सरकार के योजना मन के सुवारथ आखिरी मनखे तक मया-दया के संग सुवास्थ्य, पढ़ई अऊ जरूरी सुभीता पहुंचाना आय, ताकि कतको परवार पइसा के कमी के सेती इलाज ले बंचित झन रहय।
मुख्यमंत्री साय ह लइका मन ला सुग्घर जीवन अऊ बने भबिस बर आगे बढे के सीख दीस अऊ ओमन के दाई-ददा के घलो हौसला बढ़ाइन।
जानबा होवय के विकासखंड बलौदाबाजार के ग्राम पंडरिया के रहने वाला 6 बछर के नितिन पटेल अऊ ग्राम लच्छनपुर के रहने वाली 9 बछर के समीरा जांगड़े ह अपन दाई-ददा के संग मुख्यमंत्री ले मिलके इलाज के बाद जीबन म आय सुग्घर बदलाव ला बताइन। समीरा के ददा जीवन लाल जांगड़े ह बताइस के इलाज ले पहिली समीरा ह गजब कमजोर राहय अऊ स्कूल आय-जाय म घलो ओकर सांस फूले धर लेवय। गुरुजी मन के कहे म चिरायु टीम ले गोठ करे गिस। टीम ह घर पहुंचके जांच करिस अऊ इलाज के बेवस्था पक्का करिस। एकर बाद 14 मई 2025 को रायपुर म ओकर सफल आपरेशन होइस।
इही किसम ले नितिन पटेल के इलाज घलो चिरायु योजना के दुवारा 22 नवंबर 2025 ला रायपुर म होइस।
परवार के मनखे मन बताइन के जे इलाज के सोच लाखो रूपया खरच होय के सेती संभव नहीं लागत रीहिस, ओहा चिरायु योजना के दुवारा मुफ्त अऊ सहल तरीका ले संभव हो पाइस। ओमन कहिन के ए योजना ह गरीब परवार मन बर कतको संजीवन बूटी ले कम नोहे।
सुघर राज तिहार के बेरा म मुख्यमंत्री डहर ले मनखी मन ले सोझे गोठ-बात, योजना के लाभ पावे वाला मन ले मिलना अऊ ओमन के जीबन म आय बदलाव ला जाने के ए कोसिस ह सरकार के मया-दया अऊ जन-कल्याण बर ओकर संकरप ला देखाथे।
ए मौका म राजस्व मंत्री टंकराम वर्मा, मुख्यमंत्री के प्रमुख सचिव सुबोध कुमार सिंह, बिसैस सचिव रजत बंसल के संग दूसर नेता अऊ अधिकारी मन हाजिर रीहिन।
हमर व्हाट्सएप चैनल ला सब्सक्राइब करव अऊ मया देवव
whatsapp – https://whatsapp.com/channel/0029VaPmGTXInlqS2WQAhw1n
youtube – https://youtube.com/@jayjohar?si=AZDI5zciOCT3Oqhw
facebook – https://www.facebook.com/share/18GsFBTgfd/
