विशेष आलेख : राष्ट्रीय राजमार्ग ऊपर संजीवन बनिस डायल 1033
सोचव, तुमन एक झन सुग्घर सफर में निकल हव। चारों मुड़ा बगरे चौड़ा अउ चकाचक सड़क, रफ्तार पकड़त गाड़ी अउ गुनगुनावत सुहाना मौसम। जम्मो चीज एकदम बढ़िया लगत हे। एतके में अचानक, अगवा मोड़ में कोनो अनहोनी हो जावय…। कई बार हाइवे में होय एक ठन अनचाहा एक्सीडेंट पल भर में जिंदगी के खुसी ला मातम में बदल देते। अइसन कोनो अनजान अउ सुनसान सफर में, जहान दूर-दूर तक कोनो अस्पताल या मदद नई दिखय, उहां मोबाइल के स्क्रीन में चमकत एक ठन नंबर उम्मीद के सबले बड़े किरन बनके अगू आथे- 1033। आज देस के राष्ट्रीय राजमार्ग (National Highways) में ये चार अंक के नंबर सिरिफ एक हेल्पलाइन नई ए, बल्कि हजारों-लाखों मुसाफिर मन बर संजीवन बूटी साबित होवत हे।
संकट के बेरा में फरिस्ता बनथे एक कॉल
हाइवे में दुर्घटना होय के बाद जो सबले पहिली घंटा होथे, ओला चिकित्सा विज्ञान में गोल्डन ऑवर (Golden Hour) कहे जाथे। ए एक घंटा के भीतर यदि घायल ला सही इलाज मिल जावय, त ओकर जान बचे के संभावना 80 फीसदी तक बढ़ जाथे। 1033 एही गोल्डन ऑवर के रक्षक आय।
जैसे ही कोनो ए नंबर में फोन लगाथे, भारतीय राष्ट्रीय राजमार्ग प्राधिकरण (NHAI) के कॉल सेंटर तुरंत हरकत में आ जाथे। जीपीएस (GPS) ट्रैकिंग के जरिया हादसा के सही लोकेशन पता लगाय जाथे अउ चंद मिनट के भीतर एम्बुलेंस मौका में पहुंच जाथे। घायल मन ला नजीक के ट्रॉमा सेंटर या अस्पताल पहुंचाय जाथे। संग में रस्ता साफ करे बर क्रेन अउ पेट्रोलिंग गाड़ी मन तैनात हो जाथें।
सिरिफ 7 ले 10 मिनट में आ गिस एम्बुलेंस
एनएचएआई के 1033 सेवा के लाभ लेवइया नितिन वर्मा बताथें, “मंय रायपुर ले बिलासपुर राष्ट्रीय राजमार्ग में सफर करत रहेव। मंझनिया 2 बजे के करीब हाइवे में मोर गाड़ी के एक्सीडेंट हो गिस, मोबाइल में नेटवर्क घलो कम राहय। मोला समझ नई आवत राहय कि मंय कहां हंव? मंय 1033 में फोन लगायेंव, अउ सिरिफ 7 ले 10 मिनट के भीतर एम्बुलेंस मोर आघू में ठाढ़ राहय। वो नंबर नई, मोर बर संजीवन ले कम नई राहय।”
सिरिफ हादसा नई, हर मुसकिल के हल आय 1033
आमतौर पर लोगन मन सोचथें कि ये नंबर सिरिफ एक्सीडेंट के समे काम आथे, बाकी असल में ये हाइवे में तुहर सबले बड़े भरोसा के संगी आय। तुमन अउ कतको किसम के मुसकिल परिस्थिति में एकर मदद ले सकत हव। जैसे:
- रात के सन्नाटा में गाड़ी के टायर पंचर हो जाय या इंजन फेल हो जाय।
- हाइवे में कोनो रुख (पेड़) गिर गे हो, मवेसी आ गे होयं या कोनो भारी मलबा परे हो।
- यात्रा के बेरा अचानक कोनो संगवारी के तबीयत जादा खराब हो जाय।
- टोल प्लाजा या फास्टैग ले जुरे कोनो समस्या हो।
- हाइवे में असुरक्षा महसूस होवत हो।
अनुभव मन के जुबानी, संजीवन के कहानी
रात के सन्नाटा में भारी ट्रक के टायर फटिस, 1033 ने दीस राहत
ट्रक ड्राइवर गुरदीप सिंह अपन अनुभव बांटत कहिथें, “बात रात के करीब 09:45 बजे के आय। मंय अपना भारी-भरकम ट्रक ला लेके रायपुर ले बिलासपुर डहर बढ़त रहेव। अचानक एक ठन जोर से आवाज के संग ट्रक के टायर फट गिस। भारी गाड़ी अउ ऊपर से रात के सन्नाटा… अइसन म हाइवे के कति मा ट्रक ला खड़ा करना अउ मदद खोजना ककरो बर बड़े चुनौती ले कम नई राहय। मंय बिना बखत गंवाय 1033 में कॉल करेंव। एनएचएआई के टीम ह तुरंत मोर लोकेशन ट्रेस करिस अउ हाईवे पेट्रोलिंग टीम मौका में पहुंच गिस। टीम ह सिरिफ क्रेन अउ तकनीकी मदद के इंतजाम नई करिस, बल्कि जब तक काम पूरा नई होइस, उहां सुरक्षा के घलो ध्यान राखिस ताकि कोनो आन बड़े हादसा झन होवय।”
जब जाम हो गिस चक्का त पेट्रोलिंग टीम ह बढ़ाइस मदद के हाथ
बिलासपुर-नागपुर रूट के मुसाफिर एस.पी. चौबे ह बताइन, “हममन अपन कार ले सफर करत रहेन कि अचानक गाड़ी पंचर हो गिस। जब स्टेपनी बदले के बारी आईस, त एक नई मुसकिल खड़ी हो गिस। बहुत दिन ले पहिया खुले नई राहय, एखरे सेती वो बुरी तरह जाम हो चुके राहय। मोर ड्राइवर ह पसीना-पसीना होके ओला खोले के कोसिष करत राहय, बाकी वो टस ले मस नई होवत राहय। हाइवे के कति मा ठाढ़ हमर गाड़ी अउ ड्राइवर के मेहनत ला उहां ले गुजरत 1033 के रूट पेट्रोलिंग व्हीकल (RPV) टीम ह देख लिस।
टीम के जवान मन तुरंत हमर तीर रुकिन। ओमन सिरिफ अपन गाड़ी ले जरूरी हैवी टूल्स (औजार) नई निकालिन, बल्कि खुद आगे बढ़के जाम हो चुके चक्का ला खोलिन, टायर बलदिन अउ हमर गाड़ी ला रवाना करिन। ओकर मन के ये अपनपन अउ मुस्तैदी ह हमर दिल ला जीत लिस।”
भारी ट्रेलर के ब्रेक हो गिस जाम, मुस्तैदी ले टरिस बड़े खतरा
हाइवे में सुरक्षा सिरिफ छोटे गाड़ी मन तक सीमित नई हे, बल्कि भारी-भरकम कमर्शियल गाड़ी मन बर घलो 1033 एक सुरक्षा कवच आय। अइसने एक मामला बिलासपुर ले महासमुंद डहर जावत ब़ड़े ट्रेलर के ड्राइवर शिवम यादव के संग होइस। ओकर ट्रेलर के ब्रेक अचानक जाम हो गिस अउ गाड़ी में जरूरी एयर प्रेशर नई बन पावत राहय। बीच हाइवे में एतके बड़े गाड़ी के अइसन रुकना बहुत खतरनाक राहय।
जानकारी मिलते ही 1033 के टीम तुरंत मौका में पहुंचिस। भारी ट्रेलर के पाछू ले आवत तेज रफ्तार गाड़ी मन ला होसियार करे बर टीम ह सेफ्टी कोन अउ चेवरॉन साइन बोर्ड लगाइस, ताकि एक सुरक्षित दूरी बन सके। ए बढ़िया ट्रैफिक मैनेजमेंट के सेती न तो हाइवे में जाम लगिस अउ न ही कोनो दुर्घटना होइस। ट्रेलर ला सुरक्षित तरीका ले सुधरवाय के व्यवस्था घलो करे गिस।
सरल, आसान अउ सुविधाजनक
1033 के सबले खास बात एकर सरलता अउ तेजी आय। ये सेवा 24 घंटा, सातों दिन काम करथे। एमा भासा (बोली) के कोनो रोक-छेक नई हे। स्थानीय बोली-भासा ले लेके हिंदी अउ अंग्रेजी, हर भासा में इहां मदद मिलथे। टोल-फ्री होय के कारन मोबाइल में बैलेंस नई रहे पर घलो एमा फोन करे जा सकत हे।
बदलत भारत के संग हमर हाइवे मन घलो आधुनिक अउ हाई-स्पीड होवत हें, बाकी रफ्तार के ए दौर में सुरक्षा सबले जरूरी हे। अगली बार जब तुमन कोनो लंबे सफर में निकलो, त अपन गाड़ी के डिक्की चेक करे के संग-संग अपन दिमाग अउ मोबाइल के स्पीड डायल लिस्ट में 1033 ला जरूर सेव कर लव। काबर कि जब हाइवे में मुसकिल मन रस्ता रोकथें, त एही चार अंक संजीवन बनके जिंदगी के रफ्तार ला थमे नई दंय।
हमर व्हाट्सएप चैनल ला सब्सक्राइब करव अऊ मया देवव
Whatsapp –https://whatsapp.com/channel/0029VaPmGTXInlqS2WQAhw1n
