सोमवार ले बनही जबर सिस्टम, समुंदर ले आही भारी नमी, पूरा छत्तीसगढ़ म होही बरसा

रायपुर/बीजापुर। मौसम विभाग के अनुसार 4 अगस्त ले छत्तीसगढ़ के तीर म एक बड़े सिस्टम बनने वाला हे। एकर असर ले समुद्र ले भारी मात्रा म नमी आही अउ मानसूनी हवा ले प्रदेश म बरसा होही।

रविवार के शाम-रात ले सिस्टम मजबूत होही, जेकर ले भारी बरसा होय के संभावना हे। मौसम विज्ञानी मन के अनुसार तटीय ओडिशा, महाराष्ट्र ले होवत द्रोणिका छत्तीसगढ़ तक बनत हे। संगे-संग उत्तर-पूर्व बंगाल के खाड़ी म एक कम दबाव के क्षेत्र घलो बनत हे। ये दूनों सिस्टम के प्रभाव ले 4, 5 अउ 6 अगस्त के छत्तीसगढ़ म खासकर दक्षिण बस्तर म भारी बरसा हो सकत हे।

बस्तर म बीते कई दिन ले जमके बरसा होवत हे। शुक्रवार के दक्षिण बस्तर के बीजापुर, कोंटा, उसूर क्षेत्र म अतिभारी बरसा होईस। बीजापुर म एके दिन 210 मिमी (8.26 इंच) बरसा होईस। कोंटा म 165 अउ उसूर म 109 मिमी बरसा होईस।

बीजापुर म मूसलाधार बरसा के चलत बीजापुर जिला के तेलंगाना अउ महाराष्ट्र ले संपर्क टूट गे। जिला म बोहइया इंद्रावती नदी, तालपेरू, मिंगाचल समेत दू दर्जन ले जादा नदी-नाला मन उफनावत हें।

नदी-नाला मन के जलस्तर बढ़े के कारण चेरपाल, गंगालूर, तारलागुड़ा, तोयनार समेत एक दर्जन ले जादा गांव मन के संपर्क जिला मुख्यालय ले टूट गे हे। एकर अलावा अंदरूनी इलाका के कई दर्जन गांव टापू बन गे हें।

प्रशासन हा राहत अउ बचाव कार्य शुरू कर दे हे। प्रदेश म अभी तीन-चार दिन भारी बरसा के स्थिति बनत हे।