झरना म नहावत रिहिन कॉलेज के लड़की मन, चार झन बोहागे, एक के मिलिस लाश, तीन झन के तलाश
मुंबई। महाराष्ट्र के नवी मुंबई के तीर पिकनिक मनाए बर पहुंचे चार झन छात्रा मन पानी के तेज धार म बोहागे। ये घटना शनिवार के बिहनिया खारघर म ड्राइविंग रेंज के तीर होईस।
पुलिस के मुताबिक, कॉलेज के छात्रा मन अउ कुछ महिला मन इहां पहाड़ ले गिरत झरना म नहावत रिहिन।
घटना के सूचना मिले के बाद खारघर फायर ब्रिगेड हा तलाशी अभियान शुरू करिस। चेंबूर नाका के तीर छात्रा नेहा जैन (19) के शव मिलिस। बाकी तीन छात्रा मन के खोज जारी हे। सबो छात्रा मन मुंबई के चेंबूर के रहवइया रिहिन।
झरना के बहाव तेज रिहिस, एकर सेती पर्यटक मन के आए म रोक लगे रिहिस। महाराष्ट्र म बीते दू दिन ले भारी बरसा होवत हे।
एकर कारण झरना के बहाव बहुत तेज हो गे रिहिस हे अउ प्रशासन हा इहां पर्यटक मन के आय-जाय म रोक लगा दे रिहिस। एकर बावजूद सुरक्षाकर्मी मन ला चकमा देके छात्रा अउ महिला मन के ग्रुप हा झरना म पिकनिक मनाए बर पहुंच गे रिहिन।
