नक्सल क्षेत्र म उम्मीद के नवा किरन

पक्का घर बनिस सम्मानजनक जिनगी के आधार

रायपुर. बीजापुर जिला के उसूर विकासखंड म बसे धर्मावरम गाँव ले बदलाव के एक अइसन कहानी आगू आय हे, जेहा नक्सल प्रभावित इलाका म होवत विकास के नवा तस्वीर ल देखावत हे। कभू नक्सल के साया म रहे वाला ए इलाका ह अब सरकार के जन-कल्याणकारी योजना मन ले जुड़के विकास के मुख्यधारा म आवत हे।

ए बदलाव के जीता-जागता उदाहरण हें 60 बछर के गुण्डी बुचम्मा। ओमन बछर मन ले कच्चा अउ खपरैल के घर म रहत रहिन, जिहाँ जिनगी बिताना बहुते मुस्किल रहिस। अखाढ़-सावन के दिन म छत ले पानी टपकना, असुरक्षा अउ अड़बड़ असुविधा ओमन के जिनगी के हिस्सा रहिस। फेर अब प्रधानमंत्री आवास योजना ले ओमन ल पक्का मकान मिल गे हे, जेकर ले ओमन के मन म नवा भरोसा अउ सुरक्षा के भाव आय हे।

ए पक्का घर ह ओमन बर सिरिफ रहय के ठिकाना नो हे, बल्कि सम्मानजनक जिनगी अउ स्थायित्व के प्रतीक बन गे हे। ओकर बेटा जगत बुचम्मा ह बताइस कि अब परिवार ह सुरक्षित माहौल म रहत हे अउ रोज के जिनगी म पहिली ले जादा सुख-सुविधा महसूस करत हे।

गाँव वाले मन के कहना हे कि पहिली नक्सल प्रभाव के सेती विकास के काम रुक जावत रहिस, फेर अब प्रशासन के सक्रियता अउ सुरक्षा के पुख्ता इंतजाम ले योजना मन के काम ह तेज हो गे हे। सरकार के योजना मन अब दूर-दराज अउ अंदरूनी इलाका तक पहुँचत हे, जेकर ले आम जनता के भरोसा घलो लगातार बाढत हे।

धर्मावरम के ए कहानी ह सिरिफ एक परिवार के नो हे, बल्कि एहा बदलत बीजापुर के तस्वीर आय, जिहाँ अब डर के जगह विकास, अउ असुरक्षा के जगह उम्मीद ह ले ले हे। सरकार के कोसिस ले नक्सल प्रभावित क्षेत्र म सामाजिक अउ आर्थिक बदलाव के ए चक्का ह अब तेजी ले घूमत हे।