Chhollywood: एक अइसन गीत जेन ह बनत हे फिल्मी अंदाज म, निर्देशक दीपक कुर्रे कराय हे राम यादव, संजू टांडी अऊ रश्मि देवांगन ले बेजोड़ अभिनय

जय जोहार…. (Chhollywood) निर्देशक दीपक कुर्रे बहुत जल्द छत्तीसगढ़ी फिलिम ल निर्देशित करही, एखर तैयारी वो ह सॉन्ग मेकिंग ल फिल्मी अंदाज म कर के करत हे, ओमन ह अभी गीत के शूटिंग अऊ एडिटिंग म हाथ आजमावत हे अऊ लगभग सफल घलो होवत हे,

रायपुर म वो ह एक ठन गीत के शूटिंग करे हे, जेमा वो ह नवा प्रयोग करे के कोशिश करे हे जेमा ओमन गीत के लिपसिंग ल छोड़ के ओमा ड्रामा कराय हे, जेन ह काफी अच्छा शूट होय हे, एखर शूटिंग नवा रायपुर अऊ डब्ल्यु आर एस कालोनी म करे गे हे,

बता दन कि ये गीत म राम यादव,रश्मि देवांगन अऊ संजू टांडी ह अभिनय करे हे, तीनों झन किहींन कि नवा तरह के शूटिंग म ओमन ल बहुत मजा आइस अऊ तो अऊ निर्देशक दीपक कुर्रे के साथ काम करके काफी कुछ नवा सीखे ल मिलिस,

(Chhollywood) कैलाश मांडले के गीत ले सजे ये गीत “भुला दिये मोला” लोगन ल पसंद आही काबर की एखर निर्माण नवा तरीका ले करे जात हे, एमा तकनीकी टीम म दीपक बावनकर, टामेश, राहुल,रितेश, अऊ सरोज कुर्रे मन खूब मेहनत करे हे, ये गीत म कलाकार मन ल सँवारे के काम अंजू उरांव ह करे हे,

निर्देशक दीपक कुर्रे ह किहीस कि जल्द ही ओमन एक छत्तीसगढ़ी फिलिम के निर्माण करही जेखर बर तैयारी स्वरूप ये गीत ल नवा ढंग ले बनाए के कोशिश करे गे हे, (Chhollywood) सब के मेहनत अऊ लगन ले ये गीत शूट होय हे अऊ मोला उम्मीद हे कि ये गीत जब बन के तैयार हो जाही त लोगन मन एला जरूर पसंद करही।