chhattisgarh : मुख्यमंत्री दाई दीदी क्लीनिक योजना : प्रदेस म अब तक 96 हजार 887 ले जादा महिला मन के होय हे इलाज

जय जोहार। छत्तीसगढ़ सासन के नगरीय प्रशासन विभाग डहार ले मुख्यमंत्री दाई दीदी क्लीनिक योजना के तहत अब तक 96 हजार 887 ले जादा महिला मन के इलाज करे गेहे । दाई दीदी क्लीनिक म महिला स्टाफ के संग एम. एम. यू के डॉक्टर गरीब तंग बस्ती म पहुंचके बीमार महिला अउ स्लम इलाका म रहवइया महिला मन के आने आने बीमारी के मुफत इलाज करत हे।

महिला चिकित्सा स्टाफ ह महिला श्रमिक अउ ओखर लईका मन के मुफत इलाज करत हे। मरीज मन के पैथोलॉजी संबंधित आने आने जांच करे जात हे अउ महिला मरीज के परामर्श अउ मुफत दवा उपलब्ध कराय जात हे। दाई दीदी क्लीनिक योजना के तहत स्लम बस्ती म 1282 शिविर लगाय गेहे, जेमा 96 हजार 887 ले जादा महिला मरीज मन के इलाज करे गेहे । दाई दीदी क्लीनिक म 17 हजार 472 महिला मन के आने आने पैथोलॉजी लेब टेस्ट करे गेहे अउ 92 हजार 419 महिला मन ल मुफत दवा के वितरण करे गेहे ।