मेदांता अस्पताल म वेंटिलेटर ले हटाया जात हे अजीत जोगी ल

नई दिल्ली/ रायपुर। निमोनिया ले पीड़ित जनता कांग्रेस छत्तीसगढ़ (जोगी) सुप्रीमो अजीत जोगी के इलाज गुरुग्राम के मेदांता अस्पताल म चलत हवय। बिहनिया 10 बजे जोगी के मेडिकल बुलेटिन जारी करे गिस हे। जेकर मुताबिक अजीत जोगी के हालत स्थिर हवय अउ उमन ल वेंटिलेटर ले हटाय जात हे। जोगी के हालत स्थिर हे। उमन ल इंफेक्शन न हो येकर बर कोनो ल मिले के इजाजत नइए। मेदांता के विशेषज्ञ मन के देखरेख म पूर्व मुख्यमंत्री जोगी के इलाज किए जात हे। जोगी डॉक्टर नरेश त्रेहान के ऑब्जर्वेशन म हवय।
मेदांता ले जारी हेल्थ बुलेटिन म अजीत जोगी के हालत म तेजी ले सुधार होय के बात कहे गेहे। उंखर ले आघू के 24 घंटा तक कोनो ल भी मिले के इजाजत नइए। फेफड़ा के संक्रमण ह अउ न बढ़य येकर बर इलाज करे जात हे। उंखर संग डॉ. रमन जोगी घलोक मवजूद हे। अजीत जोगी ल मंगलवार के रात म रायपुर ले मेदांता लाय गिस हे।
फेफड़ा म पानी भरे के बाद जोगी ल मंगलवार के सांस ले बर तकलीफ होय के बाद एयरलिफ्ट कर के मेदांता म भरती कर के निरनय लेय गिस। उमन ल रायपुर के रामकृष्ण केयर अस्पताल ले माना एयरपोर्ट तक ग्रीन कॉरिडोर बनाके ले जाय गिस। येखर बाद एयर एंबुलेंस ले दिल्ली ले जाय गिस। डॉक्टर मन के टीम के संग उँखर धर्मपत्नी डॉक्टर रेणु जोगी अउ डॉक्टर गिरीश अग्रवाल घलोक दिल्ली पहुंचिन। लोगन मन ह उंखर तुरंते च स्वास्थ्य लाभ बर दुआ करत हवय। प्रदेश म कतको जगा उंखर जल्द ले जल्द ठीक होय बर पूजा-पाठ के आयोजन करे जात हे।