एसआईटी ल बताए बर  बहुत कुछु हे मंतुराम पवार के तीर…..आज हो ही पूछताछ

रायपुर। अंतागढ़ टेपकांड मामला म एसआईटी मंतुराम पवार ले आज पूछताछ करही।  मंतुराम पवार उपर पइसा लेके नामांकन वापिस लेय के आरोप हवय। अंतागढ़ टेपकांड म पूर्व सीएम अजीत जोगी के बेटा अमित जोगी अउ पूर्व सीएम डॉ रमन सिंह के दामाद पुनीत गुप्ता के ऑडियो वायरल होय रहिस हे।

कथित वायरल ऑडियो म मंतुराम ल पइसा लेके नामांकन वापिस ले के जिक्र हो रहिस हे।  मंतुराम पवार ह आखिरी बेरा म नामांकन वापिस लेय रहिस हे।  मंतुराम के नाम वापिस ले के बाद भाजपा प्रत्याशी भोजराज नाग ल आसानी ले जीत मिल गिस। ए मामला म बीते दिन मन मंतुराम पवार ह मीडिया ल बयान देय रहिस हे के, एसआईटी ल बताय बर  उंखर तीर बहुत कुछु हे।

एसआईटी ह मांगिस ओरिजनल ऑडियो टेप

अंतागढ़ टेपकांड के मास्टरमाइंड फिरोज सिद्दीकी ले काली रात के पूछताछ खत्म हो गिस।  SIT ह करीब 4 घंटे तक फिरोज ले पूछताछ करिन। एमा फिरोज ले कई पहलु मन म पूछताछ होइस हे।  संगेच SIT ह सिद्दीकी ले ओरिजनल ऑडियो टेप मांगिस हे।  मामला म कई प्रभावसाली लोगन के सामिल होय के कारन फिरोज ह अपन जान ल खतरे के आसंका जताइस हे।  संगेच  आवइया  दिन मन म  सुरक्षा के मांग करे के बात कही हे।

अउ कई लोगन ले हो सकत हे पूछताछ

फिरोज ले पूछताछ के बाद SIT चीफ एसपी रायपुर नीथू कमल ह कहिन के, ‘फिरोज ले कई पहलु मन म पूछताछ होइस हे। अउ  आवइया दिन मन म कई अउ लोगन ले पूछताछ हो सकत हे। ‘