प्रदेश साहू संघ के चुनाव म विपिन साहू के पैनल के जीत, अर्जुन हिरवानी बनिस अध्यक्ष, तुलसीदास साव अउ सरिता साहू उपाध्यक्ष

रायपुर। छत्तीसगढ़ प्रदेश साहू संघ के प्रतिष्ठा पूर्ण अउ रोमांचक चुनाव म अर्जुन हिरवानी ला अध्यक्ष पद के ताज मिले हे। उहें उपाध्यक्ष पद म पुरुष वर्ग ले तुलसीदास साव अउ महिला वर्ग ले सरिता साहू के एकतरफा जीत होए हे।

रविवार के साहू संघ रायपुर के भवन म समाज के प्रदेश अध्यक्ष अउ उपाध्यक्ष के दू पद बर चुनाव होईस। चुनाव गुप्त मतदान प्रणाली ले शांतिपूर्वक लेकिन भारी गहमा-गहमी के माहौल म होईस।

अध्यक्ष अउ उपाध्यक्ष पद के विजेता प्रत्याशी मन ला प्रदेश साहू संघ के पूर्व अध्यक्ष विपिन साहू के पैनल के माने जाथे। याने विपिन साहू पैनल के शानदार जीत होए हे। ये पैनल ला साहू समाज के दिग्गज विपिन साहू, ममता साहू, धनेन्द्र साहू, चंदूलाल साहू, दीपक ताराचंद साहू, थानेश्वर साहू, प्रवीण साहू, लेख राम साहू, संदीप साहू के पैनल माने जाथे।

उहें ताम्रध्वज साहू अउ मोतीलाल साहू गुट के हार होए हे। अइसे खबर साहू समाज के लोगन के फेसबुक अउ दूसर सोशल मीडिया साइट म वायरल होवत हे।

ये चुनाव ल लेके सरगर्मी महीनाभर ले चलत रिहिस हे। छत्तीसगढ़ म साहू समाज ल बहुसंख्य अउ ताकतवर समाज माने जाथे, ए कारण समाज के प्रदेश संगठन चुनाव ल लेके उत्सुकता बने रिहिस। ये उत्सुकता तो साहू समाज म रहिबेच कर रिहिस, साहू समाज के अलावा अन्य समाज के लोगन म घलो चुनाव परिणाम ल लेके उत्सुकता बने रिहिस। उहें राजनीतिक पार्टी मन के नजर घलो एमा टिके रिहिस कि साहू समाज के अवइया प्रदेश अध्यक्ष कोन होही अउ काकर पैनल हा चुनाव जीतही।

छत्तीसगढ़ प्रदेश साहू संघ के अध्यक्ष अउ उपाध्यक्ष के चुनाव परिणाम आज घोषित होईस। ए चुनाव म अध्यक्ष पद बर कुल-7 प्रत्याशी- अर्जुन हिरवानी (बालोद), बरसाती साहू (रायपुर), बाबूलाल साहू (कांकेर), नीलकण्ठ साहू (रायपुर), सनद कुमार बंटी (रायपुर), शान्तनु साहू (रायपुर) अउ विमल कुमार साहू (रायपुर) के बीच मुकाबला रिहिस। उपाध्यक्ष (पुरूष ) के एक पद बर तीन प्रत्याशी – अमरनाथ साहू (राजनांदगांव), गोविन्दराम साहू (धमतरी) अउ तुलसीदास साव (महासमुन्द) अउ उपाध्यक्ष (महिला) के एक पद बर दू प्रत्याशी – श्रीमती सरिता साहू (रायपुर) अउ श्रीमती यमला साहू (दुर्ग) अपन किस्मत अजमावत रिहिन।