बस्तर 2.0 के शुरुआत: मुख्यमंत्री साय ह पीएम मोदी ल दीन न्योता, विकास के ब्लूप्रिंट सउंपिन
बस्तर बर 360° प्लान-टूरिज्म, स्टार्टअप, इंफ्रा अउ इनोवेशन ऊपर फोकस
पीएम के बस्तर दौरा बनही टर्निंग पॉइंट, बड़े प्रोजेक्ट्स के मिलही सौगात
नई दिल्ली. छत्तीसगढ़ के मुख्यमंत्री विष्णुदेव साय ह आज प्रधानमंत्री नरेंद्र मोदी ले मुलाकात करिन अउ बस्तर के भविष्य के एक नवा तस्वीर आगू राखिन। ए मुलाकात म मुख्यमंत्री ह न केवल नक्सलवाद के खात्मा के बाद प्रदेश म आये शांति बर प्रधानमंत्री के आभार जताइन,भल्कुन बस्तर के जम्मो विकास बर एक बड़ अउ दूरदर्शी ब्लूप्रिंट (योजना) घलोक सउंपिन। संग म ऊमन प्रधानमंत्री ल मानसून के बाद बस्तर आये बर न्योता दीन, जिहां प्रधानमंत्री के मौजूदगी म कतकोन बड़े योजना मन के शिलान्यास अउ लोकार्पण के प्रस्ताव हे।
मुख्यमंत्री ह बताइन कि बस्तर समेत पूरा राज्य ले नक्सलवाद ह सिराय गे हे अउ अब शांति स्थापित हे। शिक्षा अउ स्वास्थ्य म सुधार बर नवा ‘एजुकेशन सिटी’, सुपर स्पेशलिटी अस्पताल अउ मेडिकल कॉलेज बनाए जात हे, उहें इंद्रावती नदिया म बैराज, रेल लाइन अउ एयरपोर्ट के विस्तार ले कनेक्टिविटी ह मजबूत होवत हे। मुख्यमंत्री ह कहिन कि ए ब्लूप्रिंट के माध्यम ले बस्तर म अब विकास, रोजगार अउ बने सुविधा मन के नवा दौर शुरू होही।
मुख्यमंत्री ह अपन विकास के दस्तावेज म ए बात के जिक्र करिन कि एक दशक पहिली प्रधानमंत्री ह बस्तर बर शांति अउ विकास के जे सपना देखे रहिन, वो अब जमीन म साकार होवत हे। नक्सलवाद खत्म होय के बाद अब मनखे मन म डर नई हे, बल्कि उम्मीद अउ विकास के नवा चमक हे। ऊमन कहिन कि प्रधानमंत्री के मार्गदर्शन ले बस्तर ल नवा दिशा अउ गति मिलही, जेकर ले क्षेत्र म बिसवास अउ उत्साह बाढ़ी।
मुख्यमंत्री कोति ले सउंपे गे विकास ब्लूप्रिंट ‘सैचुरेशन, कनेक्ट, फैसिलिटेट, एम्पावर अउ एंगेज’ के रणनीति ऊपर आधारित हे। एखर तहत बस्तर म बुनियादी सुविधा मन ल तेजी ले बढ़ाय के लक्ष्य राखे गे हे। सड़क मन के बड़े जाल बिछा के दूर-दराज के गांव मन ल जोड़े जाही। प्रधानमंत्री ग्राम सड़क योजना के बाचे काम मन ल 2027 तक पूरा करे के संग-संग नवा 228 सड़क अउ 267 पुल मन के निर्माण के प्रस्ताव हे। एखर अलावा 61 नवा परियोजना मन बर विशेष केंद्रीय सहायता घलोक मांगे गे हे।
बिजली अउ बुनियादी ढांचा के क्षेत्र म घलोक बड़े बदलाव के योजना हे। हर घर तक बिजली पहुँचाई जाय के काम म तेजी आही। शिक्षा के क्षेत्र म 45 पोटा केबिन स्कूल मन ल पक्का भवन म बदले जाही। युवा मन बर 15 स्टेडियम अउ 2 मल्टीपर्पज हॉल बनाए जाही, उहें स्वास्थ्य सेवा मन ल मजबूत करे बर प्राथमिक स्वास्थ्य केंद्र मन के विस्तार अउ डॉक्टर मन बर ट्रांजिट हॉस्टल बनाए जात हे।
खेती-किसानी अउ सिंचाई के क्षेत्र म इंद्रावती नदिया ऊपर दू बड़े प्रोजेक्ट देउरगांव अउ मटनार म मंजूर करे गे हे, जेकर ले 31,840 हेक्टेयर खेत मन ल सिंचाई के सुविधा मिलही। ये योजना मन बस्तर के कृषि अर्थव्यवस्था ल मजबूत करे म बड़ भूमिका निभाही।
रोजी-रोटी अउ आय ल बढ़ाए बर सरकार ह तीन साल के योजना तइयार करे हे, जेकर लक्ष्य 2029 तक 85% परिवार मन के महिना के कमाई ल 15,000 रूपया ले बढ़ा के 30,000 रूपया करना हे। ‘नियद नेल्ला नार 2.0’ योजना के तहत अब अउ जादा जिला मन ल जोड़े जात हे, जेकर ले विकास के लाभ ह बड़ स्तर म पहुँचही। 10 जिला मन म शुरू करे गे ये योजना अब 7 जिला अउ 3 नवा जिला (गरियाबंद, मोहला-मानपुर-अंबागढ़ चौकी, खैरागढ़-छुईखदान-गंडई) तक फैलाए जात हे।
‘अंजोर विजन 2047’ अउ ‘विकसित भारत@2047’ के तहत स्टार्टअप नीति घलोक लागू करे गे हे, जेमा 2030 तक 5,000 स्टार्टअप तइयार करे के लक्ष्य राखे गे हे।
पर्यटन के क्षेत्र म बस्तर के पहचान ल दुनिया भर म स्थापित करे बर घलोक तेजी ले काम होवत हे। चित्रकोट अउ तीरथगढ़ जलप्रपात, कांगेर घाटी नेशनल पार्क, एडवेंचर टूरिज्म, कैनोपी वॉक अउ ग्लास ब्रिज जइसन योजना मन ल विकसित करे जात हे। बस्तर ओलंपिक अउ बस्तर पंडुम जइसन आयोजन ह क्षेत्र ल नवा पहचान देवत हें। उहें, एक लाख ले जादा युवा मन ल हुनर (कौशल) के ट्रेनिंग दे जा चुके हे, जेमा ले 40 हजार मन ल रोजगार घलोक मिल गे हे।
नक्सलवाद ले मुक्त बस्तर के विकास बर मुख्यमंत्री विष्णुदेव साय ह आज प्रधानमंत्री के आगू म जे कार्ययोजना राखिन, ओमा ‘बस्तर मुन्ने’ (अग्रणी बस्तर) कार्यक्रम एक बड़ पहल हे। ए कार्यक्रम के तहत हर ग्राम पंचायत म शिविर लगाए जाही, जिहां अधिकारी मन के मौजूदगी म मनखे मन ल सरकारी योजना मन के लाभ सीधा मिलही, जरूरी कागजात मन ओही जा तइयार करे जाही अउ ओमन के समस्या मन के ओही बखत निराकरण करे जाही। एखर उद्देश्य ये हे कि हर मनखे तक सरकार के योजना मन आसानी ले पहुँचय अउ बस्तर तेजी ले विकास के डगर म आगू बढ़य।
प्रधानमंत्री के प्रस्तावित दौरा के बखत जे प्रमुख योजना मन के शिलान्यास अउ लोकार्पण के योजना हे, ओमा रावघाट-जगदलपुर रेल लाइन, जगदलपुर एयरपोर्ट के विस्तार, सुपर स्पेशलिटी अस्पताल, दंतेवाड़ा म मेडिकल कॉलेज, जगरगुंडा अउ ओरछा म एजुकेशन सिटी जइसन जरूरी काम सामिल हे। ये सबो योजना मन बस्तर ल शिक्षा, स्वास्थ्य अउ कनेक्टिविटी के क्षेत्र म नवा ऊँचाई म ले जाही।
